Monteneqronun Budva şəhərində 22 yaşadək boksçular arasında Avropa çempionatında dörddəbir final mərhələsi başa çatıb.
Millimizin daha 4 üzvü qələbə qazanaraq yarımfinala vəsiqə qazanıb. Yığma üzvlərindən Tural Sarıyev (48 kiloqram) Padraiq Dovneylə (İrlandiya) qarşılaşıb. O, rəqibini 5:0 (30:26, 30:27, 30:26, 30:27, 29:28) hesabı ilə məğlub edib. T. Sarıyev yarımfinalda Muşeq Bayanduryanla (Rusiya) döyüşəcək.
Nicat Hüseynov (51 kiloqram) da növbəti qələbəsini qazanıb. Avropa çempionumuz bu dəfə italiyalı Fares Al-Assini mübarizədən kənarlaşdırıb – 5:0 (30:27, 30:27, 30:27, 30:25, 30:27). O, finala gedən yolda türkiyəli Semih Gümüşlə münasibətinə aydınlıq gətirəcək.
57 kiloqram çəkidə Əzrək Bəbirov dörddəbir finalda irlandiyalı Pears Keri ilə qarşılaşıb. Döyüş yığma üzvünün 5:0 (28:27, 29:26, 29:26, 29:26, 29:26) hesablı qələbəsi ilə başa çatıb. İdmançı növbəti görüşündə Rafiq Əmirxanovla (Rusiya) üz-üzə gələcək.
“Paris-2024” Yay Olimpiya Oyunlarına lisenziyanı təmin edən Murad Allahverdiyev (80 kiloqram) Delil Dadayevi (Almaniya) sınağa çəkib. Döyüş həmyerlimizin 4:1 (29:28, 29:28, 28:29, 29:28, 29:28) hesablı qələbəsi ilə yekunlaşıb. O, yarımfinalda fransalı Yojerlin Sesarla gücünü yoxlayacaq.
Bununla da yarımfinala vəsiqə qazanan və özləri üçün ən azı bürünc medalı təmin edən Azərbaycan boksçularının sayı 5-ə yüksəlib. Daha əvvəl Marjona Savriyeva (50 kiloqram) da bu hüquqa yiyələnib.
Millinin digər boksçularından Ruslan Qədirovla (54 kiloqram) Maqsud Xasmetov (60 kiloqram) isə medalın 1 addımlığında – 1/4 finalda məğlubiyyətə üzülüblər.
Qeyd edək ki, yarımfinal görüşləri bu gün keçiriləcək.
|
