Uimbledon da daxil olmaqla bir çox turnirin ləğvi və turdakı məcburi fasilə dəhşətli nəticələrə səbəb olur. İndi tennisçilərin əksəriyyətinin yaşayışı çox çətinləşib.
Tennisçilər nə qədər qazanır?
Biz tennis ulduzlarının çox varlı insanlar olduğunu düşünməyə öyrəşmişik. Belə ki, Roger Federer, Novak Cokoviç və Rafael Nadal stabil olaraq dünyanın “Top-10”da yer alırlar. Həmçinin “Forbes”in siyahısında qadın tennisçilər də çoxdur. Təkcə 2019-cu ildə R.Nadal, yalnız qələbələr sayəsində 16,3 milyon dollar, N.Cokoviç 13,3 milyon, dünya reytinqinin ilk beşliyini qapayan Daniel Medvedev 7,9 milyon, ilk onluğu qapayan ispaniyalı Roberto Bautista-Agut 2,9 milyon dollar qazanıblar. Hələ reklam müqavilələri bura daxil deyil. Belə gəlirlə yaşamaq, əlbəttə ki, çox rahatdır.
Yüksək gəlir ancaq ulduzlara aiddir
Digər komanda idman növlərində də vəziyyət oxşardır. Belə ki, dünyanın 100 ən yaxşı futbolçusu, hokkeyçisi, beysbolçusunun pula ehtiyacı yoxdur. Onlar da tennisdə olduğu kimi milyonlar qazanırlar.
Tennis bahalı idman növüdür
Düzdür, tennisçilər çox qazanırlar. Lakin qazandıqları pulun hamısını öz hesablarına yığa bilmirlər. Burada söhbət təkcə tennisçilərin turnirlərdə yarışdıqları ölkələrin qanunlarına əsasən ödədikləri vergilərdən getmir. Məsələn, müqavilə ilə işləyən basketbolçu, futbolçu, hokkeyçi karyerası ilə əlaqəli heç nəyə pul xərcləmir. Onları klub hesabına müalicə edir, qidalandırır, geyindirir, məşq keçirlər. Oyunçu vergini çıxmaq şərtilə qazandığını özünə götürür. Eyni zamanda, oyunçular matçda iştirak edib-etməmələrindən asılı olmayaraq öz maaşlarını alacaqlar. Üstəlik, vaxtaşırı qələbələr, kuboklar və titullar üçün hər növ bonuslar gəlir. Söz yox ki, bu oyunçular pis oynasalar, onlara yeni əlverişli müqavilə təklif edilməyəcək.
Tennisçilər isə özlərini təmin etməlidirlər. Oyunçunun yarışın təşkilatçılarından ümid etdiyi turnirin keçirildiyi müddətdə pulsuz otel otağı (uduzsan ya getməlisən, ya da pulu özün ödəməlisən), üstəgəl, ən yaxşı halda gündəlik yaşayış üçün cüzi müavinətdir (gündə təxminən 50 dollar). Qalan hər şey - həm avadanlıqlar, həm uçuşlar, həm də məşqçi xidmətləri tennisçinin hesabınadır. Xəsarət aldıqda, öz vəsaitləri ilə müalicə olunan, həkimlərin xidmət və icarə haqlarını özləri ödəyən tennisçilərə bu xərclərin kompensasiya ediləcəyinə zəmanət verilmir. Buna görə uğur qazanmağı bacarmayan, lakin belə problemlərlə üzləşən oyunçular karyera qurmaq üçün pulları çatmadığına görə idmanı tərk edirlər.
“Vərəqələr hələ də gəlir və onlar ödənilməlidir”
Hazırda dünyanın 100-cü tennisçisi ayda 4-5 min dollar qazanır. İnkişaf etmiş ölkələrdə bu polis və ya direktorun adi əmək haqqıdır. Bu məbləğ yaşamaq üçün kifayət etsə də, şəxsi villa və “Bentley” almaq üçün yetərli deyil. İndi bütün tennisçilər problemlərlə üzləşiblər. Turnirlər ən azı iyulun ortalarına qədər ləğv olunub. Dörd aydan çoxdur ki, idmançılar oynaya bilmirlər və buna görə də pul qazanmırlar. Yaxşı, tutaq ki, ulduz tennisçilər qazandıqları pulun hesabına bu dövrü başa vuracaqlar. Bəs aşağı sıralarda qərarlaşan tennisçilərin aqibəti necə olacaq? Onların arasından bəlkə də, kimsə potensial super ulduz olacaq. İndiki vəziyyətdə tennisçilər sadəcə yaşaya bilmirlər. Xüsusilə mövsüm tamamilə ləğv edilərsə, onları təhlükə gözləyir. Dünyanın 371-ci raket ustası gürcüstanlı Sofiya Şapatava hazırkı vəziyyətlə bağlı belə deyib: “Əminəm ki, ac qalmayacağam. Lakin vərəqələr hələ də gəlir və onlar ödənilməlidir. Aylarla davam edən fasilədən sonra bunu etmək çox çətin olacaq”.
ATP və WTA vəziyyətlə maraqlanır və oyunçulara maddi cəhətdən kömək etmək üçün yollar axtarırlar. Ancaq bunu etmək asan olmayacaq. Vəziyyət pisləşərsə, “Top 100”lükdən kənarda qalan əksər tennisçilər (eləcə də, “Top 100”lüyə daxil olan bəzi tennisçilər) idman karyerasını bitirmək və başqa peşə seçmək məcburiyyətində qalacaqlar.
Bəsti Sabirqızı
|
