Azərbaycan İslam Həmrəyliyi Oyunları Əməliyyat Komitəsi (AİHOƏK) və BP Şirkətinin birgə tərəfdaşlığı ilə fəaliyyətə başlayan “Uğurlu gələcək” Könüllülərin İnkişaf Proqramının tərkib hissəsi olaraq 4 aprel tarixində ağacəkmə aksiyası keçirilib.
Aksiya Bakı 2017 Könüllülərinin sosial fəallığını artırmaq, eləcə də təbiətimizin qeydinə qalmaq və cəmiyyətimiz üçün sağlam yaşamı vəd edən ekoloji mühit təmin etmək uğruna ətrafı yaşıllaşdırmaq məqsədi ilə təşkil edilib.
Ceyranbatan Su Anbarı ərazisində keçirilən ağacəkmə aksiyasına 50 nəfəri könüllü olmaqla, ümumilikdə 100 nəfər qatılıb. Bakı 2017 Könüllülərinin xüsusi fəallığı ilə baş tutan aksiyanın sonunda 500 ədəd ağac əkilərək ətraf mühitin mühafizəsinə töhfə verilib.
Könüllülərdən başqa, 4-cü İslam Həmrəyliyi Oyunlarının ulduz səfiri, xeyriyyəçi və televiziya aparıcısı Hacı Nuran Hüseynov, eyni zamanda idmançı səfirlər – Bakı 2015 Avropa Oyunlarının, həmçinin, yüngül atletika üzrə Yeniyetmələr arasında keçirilmiş Avropa Çempionatının qızıl medal mükafatçısı Nazim Babayev, boksçular Aynur Rzayeva və Leyla Cavadova də bu ağacəkmə aksiyasında iştirak edərək, öz dəstəklərini əsirgəməyiblər.
Ulduz səfir Hacı Nuran ağacəkmə aksiyası ilə bağlı öz fikirlərini bildirərkən qeyd edib: “Ətraf mühitin qorunması üçün sosial tədbirlərin həyata keçirilməsi təşəbbüsü çox təqdirəlayiq hadisədir. İslam Həmrəyliyi Oyunlarının ulduz səfiri olaraq, belə bir önəmli aksiyaya dəstək olmaqdan məmnunluq duyuram. İnanıram ki, bu gün burada əkilən ağaclar sağlam bir gələcək üçün zəmin yaradır.”
Beləliklə, bu tədbirin həyata keçirilməsi ilə, həm Bakı 2017 Könüllülərinin sosial fəaliyyətinin artmasına nail olunub, həm də təbiətə qayğı hissinin aksiya iştirakçılarına verdiyi həvəs və məsuliyyət hissi sayəsində gələcək nəsillərə təmiz və təhlükəsiz bir mühitin irs qoyulması adına əhəmiyyətli bir addıma imza atılıb.
-SON-
Redaktorlara qeydlər:
Media akkreditasiyası:
IV İslam Həmrəyliyi Oyunları üçün media akkreditasiyasına müraciət üçün aşağıdakı linkə daxil olun: https://www.baku2017.com/az/p/media-akkreditasiyasi
Bakı 2017 İslam Həmrəyliyi Oyunları 2017-cu il may ayının 12- 22 tarixlərində Bakı, Azərbaycanda keçiriləcək İslam dünyasını birləşdirən maraqlı, multi-idman tədbiridir.
Müsəlman ölkələrindən gələn idmançılar yarışın 10 günü ərzində öz ölkələrini 20 müxtəlif idman növləri üzrə 23 kateqoriyada (Atletika və Para Atletika, Su İdmanı Növləri - Suya tullanma, Su idman növləri — Üzgüçülük, Su İdmanı Növləri -Vaterpolo, 3x3 Basketbol, Futbol, İdman gimnastikası, Bədii gimnastika, Uşu, Stolüstü Tennis, Həndbol, Cudo və görmə qabiliyyəti olmayanlar üçün cudo, Yunan-Roma güləşi, Sərbəst güləş, Atıcılıq, Tennis, Voleybol, Boks, Zorxana, Karate, Taekvondo, Ağır atletika) Bakıda yerləşən 16 müasir yarış meydanlarında təmsil edəcəklər.
Azərbaycanın paytaxtı Bakı şəhəri 2013-cü ilin iyulunda Ciddədə İslam Həmrəyliyi İdman Federasiyasının (ISSF) Baş Assambleyasında Oyunların ev sahibliyinə layiq görülmüşdür.
İslam Həmrəyliyi Oyunlarının Təşkilat Komitəsi Azərbaycan Respublikasının Prezidenti cənab İlham Əliyevin fərmanı ilə yaradılıb. Fərmana əsasən, Azərbaycanın Birinci Vitse Prezidenti Mehriban xanım Əliyeva dördüncü İslam Həmrəyliyi Oyunlarının Təşkilat Komitəsinin Sədri təyin edilmişdir. Azərbaycan İslam Həmrəyliyi Oyunları Əməliyyatlar Komitəsi (AİHOƏK) İHİF ilə əməkdaşlıqda Oyunları təşkil və tətbiq edəcək.
|
