Rusiyanın Anapa şəhərində boks üzrə yeniyetmələr arasında Avropa birinciliyi davam edir. Noyabrın 11-də axşam proqramında milli komandamızın daha 3 üzvü rinqə çıxıb. 46 kq çəki dərəcəsində mübarizə aparan Rüfət Hüseynov ilk görüşdə İngiltərə idmançısı Konnor Batleri məğlub edib – 2:1. Boksçumuz 14 finalda Ermənistan nümayəndəsi Sergey Getevonyanla qarşılaşacaq. Tayfur Əliyev də (52 kq) ilk görüşünü qələbə ilə başa vurub. Həmyerlimiz rumıniyalı Marian Ruta üzərində çətin qələbə qazanıb – 2:1. Əliyev 14 finalda macarıstanlı İştvan Szaka ilə üz-üzə gələcək.
İsmayıl Hüseynov isə (63 kq) İrlandiya təmsilçisi Cohn Coyza uduzaraq, yarışla vidalaşmalı olub. Qeyd edək ki, noyabrın 16-dək davam edəcək yarışda millimiz baş məşqçi Rasim Məmmədov, məşqçilər Elbrus Rzayev, Hüseyn Bağırov və Təvəkkül Məmmədovun rəhbərliyi altında çıxış edir. Avropa birinciliyində 13 yeniyetmə boksçumuz gücünü sınayır.
Xəbər 1226 dəfə oxundu.