Beş avarçəkənimiz Almaniyada keçirilən dünya çempionatında iştirak edir

Almaniyanın Lints şəhərində 23 yaşadək akademik avarçəkənlər arasında dünya çempionatı keçirilir. 52 ölkədən 811 idmançının yer aldığı çempionatda Azərbaycan da təmsil olunur. Ötən ilki dünya çempionatında 1 nəfərlik qayıqla (BM1X) yürüşdə qızıl medal qazanmış Aleksandr Aleksandrov artıq böyüklər kateqoriyasına keçib. Bu səbəbdən, o, Lintsdəki mundiala qatılmayacaqdır. Əvəzində 5 təmsilçimiz qüvvəsini sınayacaq. 1 nəfərlik yüngül çəkili qayıqla (BLM1X) 2000 metr məsafəyə yürüşdə Fərid Saadov yer alacaq. Bu kateqoriyaya hamıdan çox – 28 avarçəkən sifariş olunub. İdmançımız 23 yaşadək akademik avarçəkənlərin dünya çempionatında ilk dəfə çıxış edəcək. İkinəfərlik sükansız qayıqla (BM2-) yürüşdə İqor Luçiç – Luka Dordeviç dueti mübarizə aparacaq. Bu cütlük 2009-cu ildə Serbiya yığmasının üzvləri kimi yeniyetmələr arasında dünya çempionu olub. 2011 və 2012-cü ildə 23 yaşadək akademik avarçəkənlər arasında keçirilmiş dünya çempionatlarında isə onlar 4 nəfərlik qoşa avarlı qayıq (BM4X) ekipajının tərkibində qızıl medala sahib olublar. Nəhayət, yeniyetmələr arasında son Avropa çempionumuz Boris Yotov İvan Antovla birgə 2 nəfərlik qoşa avarlı qayıqla (BM2X) çıxış edəcəklər. Onlar qələbə uğrunda 16 ölkədən olan duetlə yarışacaqlar. Yotov – Antov cütlüyü daha əvvəl böyüklər arasında Avropa çempionatına qatılıb. Qeyd edək ki, dünya çempionatına iyulun 28-də yekun vurulacaq.

Xəbər 748 dəfə oxundu.