Milli futbol çempionatı kulminasiya nöqtəsinə, yəqin gələn tur yetişəcək. Aprelin 9-da çempionatda qələbəyə real iddiası qalmış iki klub üz-üzə gələcək. Bu qarşılaşmada qələbə son çempionun daha bir mövsümdə təntənəsinin rəmzinə çevriləcək. Çünki bundan sonra ona 3 turda ya uduzmamaq, ya da 3 oyundan birində qələbə qazanmaq kifayət edəcək. Buna ehtiyac olmaması üçün "Qarabağ"a hədiyyəni "Qəbələ" özü, elə ötən turda olduğu kimi, büdrəməklə etməlidir."Qəbələ"yə isə tam əksinə, təkcə qarşıdakı tet-a-tet dueldə qələbə və sonrakı görüşlərdəki qələbələr kifayət etməyə bilər. Komanda indiki 4-xallıq fərqi hətta bir xala endirsə belə, sonrakı turlarda "Qarabağ"ın daha bir dəfə büdrəməsini gözləməlidir. Təbii ki, bütün bunlarla yanaşı, son 3 görüşdə "Qəbələ" özü mütləq qələbələr qazanmalıdır.
Bir variant da var: qarşıdakı dueldə liderlərin heç-heçəsi. Bu halda "Qarabağ"a iki qələbə, yaxud "Qəbələ"nin büdrəməsi lazımdır. "Qəbələ" isə "Qarabağ"ın sonrakı rəqiblərdən birinə məğlubiyyəti ilə yanaşı, daha bir qarşılaşmada xal itkisini gözləməlidir. Bir sözlə, ilk baxışda bu mürəkkəb riyaziyyat mənzərəsi sadədən də sadədir. O, hər turda bir qədər də sadələşib adiləşəcək.
Keçək ötən oyunlara. "Qarabağ" keçən tur daha bir çempionluq zirvəsinə ciddi addım atdı. Əlbəttə, özünün qələbəsi ilə yanaşı, məhz prinsipial rəqibi kimi, "Qəbələ"nin məğlubiyyətə bərabər heç-heçəsi sayəsində. Hərçənd qarşılaşmaları eyni vaxtda başlayan bu cütlüyün görüşlərinin birinci hissəsində vəziyyət tam əksinə idi. İlk qolu buraxan "Qarabağ" hesabı yalnız fasilə ərəfəsində bərabərləşdirdi; "Qəbələ" isə hesabda önə çıxmaqla ümidləndi. Fəqət ənənələrə sədaqət qalır: hər iki klub haqqında il boyu söylədiklərimiz, demək olar ki, olduğu kimi yenə özünü büruzə verdi. "Qarabağ" vacib məqamda özünü-gücünü toparladı, "Qəbələ" isə yenə illərdir davam edən oyunsuzluq sindromuna düşdü. Ümumiyyətlə, ənənəsinə sadiq qalsa, "Qarabağ"ı bundan sonra keçmək heç asan olmayacaq. Bu komanda finiş xəttini yaxşı templə ötməyi bacarır. Ənənəvi eniş dövrünü isə klub, belə görünür ki, artıq "Kəpəz"lə oyunda geridə qoydu. Bundan savayı, "Qarabağ" ən həlledici məqamda özünü toparlaya bilir. Üstəlik, bu mübarizədə sülh "Qarabağ" üçün qızıla bərabər bir xal, "Qəbələ" üçünsə 4 xala bərabər itki qiymətində olacaq. Buna görə "Qarabağ" "Qəbələ" ilə matça sürprizlərlə çıxa bilər. "Qəbələ" isə artıq tapmacalara cavab tapmaq üçün həmin görüşdə istənilən ssenariyə hazır olmalıdır. Əks təqdirdə, onun bir çıxış yolu var: əvvəldən rəqibi tam təzyiq altında saxlayıb bəxtə güvənmək. Çünki indiki vəziyyətində "Qəbələ"nin rəqibi tam təzyiq altında saxlamağa gücü-qüdrəti yoxdur, deməli, ən çox bəxt amilinə ehtiyacı var. Qafqaz klubunun oyun planında problemləri hələ göz dağı kimi “pöhrələnir”, onun həllinə məşqçinin nə üçün gücünün yetmədiyini söyləməyə çox fərziyyə var. Həqiqət isə birdir - artıq "Qəbələ" dəyişikliyə və kursu yeniləməyə tam hazır olmalıdır. Bunun oyun, oyunçu, ya məşqçi planında baş verən bir hadisəyə çevrilməsi isə klub rəhbərliyinin qərarı və qənaətinə bağlı olan məsələdir. "Qarabağ"ın da dəyişikliyə kəskin ehtiyacı var. Amma burada çox şey bəllidir - ilk növbədə, oyunçu, daha sonra bunun davamı olaraq oyun.
Çempionluğa namizədlər barədə sözü-söhbəti başa vurub, keçək digər yerlərə iddialılara. Başı dərdli "İnter" artıq çıxış yolunu elitada daha yüksək yer tutmaqla həll etmək üçün çalışmalıdır. Bu halda hansısa oyun elementindən danışmağa dəymir.
"Zirə" finiş ərəfəsində daha bir şansı, həm də sanbalını təsdiq edən fürsəti Qəbələdə qazandı. Həm də komandanın UEFA-dan aldığı müsbət rəydən sonra daha inamla oynamağa stimulu, şövqü var və bunu da nümayiş etdirdi. Fəqət Avropa arenasında "Kəpəz"in ötənilki yolunu təkrarlayıb, yarıyolda dayanmamaq üçün "Zirə"nin ciddi dəyişikliklərə, ən əsası, strateji hədəfləri yüksəltməyə ehtiyacı var. Çünki ötənilki strateji planlar məhz səbatın yetərli olmaması üzündən böhranla əvəzləndi.
"Kəpəz"in də ləngər vurması eyni qəbildən olan məsələdir. Əvəzində tam yeniləşmək niyyətində olan "Neftçi"nin özünə gələ bilməməsi, hələ qış fasiləsində qeyd etdiyimiz kimi, heç də komandada uyğunlaşmaya bağlı olan proses deyil. Bu məsələ həm kubokun yarımfinal, həm də "Sumqayıt"la matçda göründüyü kimi, məhz oyun quruculuğuna yanaşmadakı nöqsan və qüsurların cəmini özündə ehtiva edən yetkinsizlikdir. Əgər "Neftçi" nə oynayır" sualı verilsə, "Sumqayıt"la oyuna baxmaq yetər: 90 dəqiqə bu komandanın meydanda nə istəyib, nəyə çalışdığı, nəyə can atdığı bəlli olmadı. Çünki məntiq ardıcıllığı və yetkinliyi yox idi. Hətta qapıya vurulan zərbələrin özü də kal - dəyməməmiş meyvə kimi, sadəcə, kor-koranə zərbələrə bənzəyirdi. Buna görə də ən məntiqli hücum sonluqlarında belə, ədalətin hökmü ilə nəticə əldə olunmadı.
Nəhayət, "sonuncu kimdir" sualının cavabı. Artıq AZAL-ın bu pillədə qərar tutacağı məlumdur. İndi komandanın aqibəti daha maraqlıdır. Bunun üçün də gözləmək lazım gələcək. Oyun planında isə bu gün məhz məğlubiyyətlərə düçar olan bu komanda ən məzmunlu, ən məntiqli, təkamüllü və yetişən siması ilə meydana çıxır və açığı, daha xoş təsir bağışlayır. Ona görə də bu klubu da aşağı dəstəyə yola salmaqla itirmək Azərbaycan futboluna bir zərbə olacaq. Bu məqamda düşündürücü bir süal ortaya çıxır: AFFA PFL-i ilə birlikdə nə vaxt aşağı diviziona ciddi münasibət bəsləməyə başlayacaq. Söz yox ki, məntiqdən söz salmışıqsa, oxucularımızın məntiqli cavabı da ola bilər: yüksək diviziona münasibətdə ciddi yanaşma varmı ki, aşağı dəstədə də olsun?! Axı bir vaxtlar, futbol anlayışı olanların kəskin etirazına baxmayaraq, 8-komandalıq yarış formatını böyük və güclü rəqabət rəmzi kimi təqdir edənlərin xülyalarının puç olduğu bir dövrdə azarkeşin bu kimi məntiqə hər bir əsası var.
Xəbər 1546 dəfə oxundu.