Qrupdan çıxmağa hər bir şans var
Sentyabrın 10-dan oktyabrın 1-dək uzaq Kolumbiyada keçiriləcək Dünya kubokunun həlledici mərhələsi, Azərbaycan yığmasının dünya futzal nəhənglərinin sammitində ilk dəfə iştirak etməsi ilə bizim üçün əlamətdar hadisə olacaq. Komanda İspaniya, İran və Mərakeşlə "F" qrupunda yer alıb.

Bütün iştirakçılarla müqayisədə, Mozambik, Özbəkistan və Vyetnamla birlikdə turnirin debütantı olsa da, bu tarixi əhəmiyyətli ilk turnirdə yığmamızın özünəməxsus uğuru, ən azı, qrup mərhələsindən çıxması sayıla bilər. Debüt oyununu təmsilçilərimiz sentyabrın 12-də Medelyində "Kolizeo İvan de Bedut" arenasında mərakeşlilərlə keçirəcəklər. Yeri gəlmişkən, futzalçılarımız bütün görüşlərinə bu arenanın mərkəzi zalında çıxacaq. Komandamız, sözsüz ki, debüt həyəcanı da nəzərə alınmaqla, bu fürsəti əldən verməməlidir. Çünki böyük əksəriyyətlə, sentyabrın 18-də son matçda ən prinsipial rəqibimiz olacaq İranla qarşılaşmaya qədər bu görüş həlledici əhəmiyyət kəsb edəcək. Bu oyunda vurulan hər top xeyrimizə işləyə bilər.

Həmin gün digər oyunda ikiqat dünya çempionu ispanlarla İran millisi üz-üzə gələcək. Maraqlı bir cəhəti də qeyd edək ki, bunaqədərki iki çempionatda bu komandalar mündialın final mərhələsində nəinki bir-birinə qrup rəqibi olublar, hətta açılış oyunlarında üz-üzə gəliblər. Özü də, biz də diqqətdən qaçırmayaq ki, hər iki matç heç-heçə ilə başa çatıb.

Futzalçılarımızın sonrakı rəqibi sentyabrın 15-də qarşılaşacağı pireneylilərdir. Bu matçı da ciddi qəbul etməliyik. Çünki onun nəticəsi - qələbə və məğlubiyyətin top fərqi, yaxud, heç-heçə də daxil olmaqla, vurulub-buraxılan toplar son hesablamalarda əhəmiyyətli ola bilər. Axı, yarışda üçüncü yerlərin sahibləri arasından da 1/8 finala vəsiqə əldə edənlər olacaq. Reqlamentə görə, ilk iki yerin sahiblərindən savayı, 6 qrupdan 4-ündə, nəticələrə əsasən, üçüncü yerlərin sahibləri də bu hüquqa sahib çıxacaqlar.

Komandamız üçün həlledici oyun İran millisi ilə olacaq. Qonşu komandanın aparıcı oyunçularından biri olan Hüseyn Tayibi turnirin yarımfinalına qədər gedə biləcəklərini və bunun üçün bütün qüvvələrini sərf edəcəklərini deyib. Bunun adi sözlər olmadığı bəllidir.

Bu günlərdə FİFA-nın rəsmi saytında Azərbaycan komandası yarışın sürprizə qadir olan debütantı kimi dəyərləndirilib. Eyni sözləri Tayibi də deyib: "Azərbaycanla üz-üzə gəlməmişik. Lakin deyə bilərəm ki, onların çox güclü heyəti var. Oyunlarını da izləmişik. Dünya kubokuna hamı böyük iddia və yüksək hazırlıqla gələcək. Bununla belə, bu rəqiblə matça da yalnız qələbə üçün çıxacağıq".

Əlbəttə, futzal komandamızın rəhbərlərinin də öz hesabı var. Bizə isə yarış haqqında indidən fikir söyləmək bir az çətindir. İlk öncə ona görə ki, komandamız yeni sükançısı 54 yaşlı Milton Luiş Ziller Cünyor və yaxud "Miltinyu" ilə ilk ciddi sınağına məhz uzaq Kolumbiyada çıxacaq. Bu mənada futzalçılarımızın "oyun libası", taktiki düzülüşü, oyunçu qalaqurmaları bizim üçün də böyük sürpriz ola bilər. Əvvəlki məşqçi isbat etmişdi ki, komanda sürətlə dəyişə bilir. Hələlik onu qeyd etmək olar ki, yeni sükançı ilə yığma bu ərəfədə Özbəkistan milli komandası ilə oyunlarda ümidverici görünüb. Birinci matç 3:3 hesabı ilə başa çatsa da, ikincidə futzalçılarımız 6:2 hesabı ilə qalib gəliblər.

Son hazırlıq çərçivəsində milli bu günlərdə "ABU Arena"da yerli klubların formasını geyinən oyunçuların yığması ilə iki matç keçirib. Onu da əlavə etmək yerinə düşər ki, FİFA turnirə gələn komandaların bütün xərclərini üzərinə götürməklə, həm də bir çox əsas təşkilati işləri özü həll edəcək. Bunun da komandalara müəyyən təsiri ola bilər.
İlkin məlumata görə, hazırlıq baxımından saat qurşağı, coğrafi fərqlərin komandamıza təsirlərinin aradan qaldırılması məqsədilə bəzi işlər görülüb. Komandanın səfərə çıxacağı tarixə görə, bu məsələ bir qədər ehtiyatlanmağa vadar edir. Amma şərait ev sahibi, bir də amerikalılar istina olmaqla, hamı üçün eyni olacaq. Buna görə də istənilən halda, komandamız qrupdan çıxmağa borcludur.

FİFA artıq bütün komandaların üzvlərinin siyahısını da elan edib. Baş məşqçi Miltinyu millimizin heyətində qapıçılar - 1. Emin Kürdov, 2. Elnur Zamanov, 12. Rövşən Hüseynli; müdafiəçilər - 8. Rizvan Fərzəliyev, 10. Villiams Vassura Oliveyra du Nassimentu, 11. Xətai Bağırov, 13. Everton Qallo Kardozo; hücumçular - 3. Tyaqu Bolinya Teleş Martinş, 4. İsa Atayev, 5. Fineu De Arauju, 6 Eduardu Mellu Borceş, 7. Ramiz Çovdarov, 9. Fabio Poletto, 14.Vitali Borisova yer verib.

Final mərhələsi Medelyinlə yanaşı, Kali və Bukaramanqa şəhərlərində keçiriləcək.
Digər qruplarda yer alan komandalar belədir: "A" qrupu: Kolumbiya, Portuqaliya, Özbəkistan, Panama; "B" qrupu: Rusiya, Tailand, Kuba, Misir; "C" qrupu: İtaliya, Paraqvay, Vyetnam, Qvatemala; "D" qrupu: Braziliya, Ukrayna, Mozambik, Avstraliya; "E" qrupu: Argentina, Qazaxıstan, Solomon adaları, Kosta Rika.

Yarışın 1/8 final oyunları sentyabrın 20-22-də, 1/4 final görüşləri 24-25-də, yarımfinallar 27-28-də, 3-cü yer uğrunda oyun və final oktyabrın 1-də Kalidə keçiriləcək.



Xəbər 1878 dəfə oxundu.