Azərbaycan karateçisi Tural Ağalarzadə III Avropa Oyunlarının finalına yüksəlib

Azərbaycan karateçisi Tural Ağalarzadə Polşada keçirilən III Avropa Oyunlarının finalına yüksəlib. Yarışda 67 kiloqram çəki dərəcəsində mübarizə aparan təmsilçimiz yarımfinal mərhələsində polşalı Miloş Sabieçki ilə qarşılaşıb. Rəqibini məğlub edən karateçimiz qızıl medal uğrunda görüşdə iştirak hüququ qazanıb. Karateçimiz qrup mərhələsində macarıstanlı İv Tadiss, Toni Pissino (İsveçrə) və yunanıstanlı Dionisios Xenosa qalib gələrək yarımfinala adlayıb. Karateçimiz finalda yenidən yunanıstanlı Dionisios Xenos ilə qarşılaşacaq. İyulun 2-dək davam edəcək III Avropa Oyunlarında 48 ölkədən 7 minə yaxın idmançı mübarizə aparacaq. İdmançılar 29 növ üzrə 253 dəst medalın sahibini müəyyənləşdirəcək. Azərbaycan Krakov-2023-də 13 növ üzrə 86 idmançı ilə təmsil olunur. Qeyd edək ki, tarixdə ilk Avropa Oyunları 2015-ci ildə Bakıda, ikinci multiidman tədbiri 2019-cu ildə Minskdə baş tutub. Azərbaycan millisi bu yarışlarda 84 medal qazanıb. İdmançılarımız 26 qızıl, 25 gümüş və 33 bürünc mükafat əldə edib. Komandamız medal sıralamasında Bakı-2015-də 2-ci, Minsk-2019-da 10-cu yeri tutub.

Xəbər 164 dəfə oxundu.