Sloveniya Bakıda dünya kuboku yarışlarında iki gimnastla təmsil olunacaq

Aprelin 21-23-də Bakıda bədii gimnastika üzrə dünya kuboku yarışları keçiriləcək. Ölkəmizin gimnastika növləri üzrə bu il ev sahibliyi edəcəyi üçüncü beynəlxalq yarışda qeydiyyat siyahısına əsasən, 46 ölkədən idmançılar fərdi və qrup hərəkətləri proqramında mübarizə aparacaqlar. Sloveniya millisinin dünya kuboku yarışları üçün heyəti açıqlanıb. Komanda Bakıda iki gimnastla təmsil olunacaq. Belə ki, dünya çempionatının bürünc mükafatçısı Yekaterina Vedeneeva və Brigita Kraşoveç fərdi proqramda çıxış edəcəklər. Üç gün ərzində baş tutacaq yarışlarda gimnastlar ayrı-ayrı alətlər və çoxnövçülük üzrə mübarizə aparacaqlar. Ənənəyə uyğun olaraq, yarışlarda ən çox icra xalını toplamış gimnast və qrup komandasına “AGF Trophy” kuboku təqdim olunacaq. Qeyd edək ki, bu, ölkəmizdə bədii gimnastika üzrə təşkil ediləcək onuncu dünya kuboku yarışları olacaq. Paytaxtımız 2005-ci və 2019-cu illərdə bu növ üzrə dünya çempionatına ev sahibliyi edib.

Xəbər 123 dəfə oxundu.