Avarçəkmə “İdman festivalı-2022”də təmsil olunur

Gənclər və İdman Nazirliyinin təşkilatçılığı ilə Şəki Olimpiya İdman Kompleksində “İdman festivalı-2022” keçirilir. Festivalda 23 idman növü üzrə 200-dək idmançı və 35 məşqçi iştirak edir. Proqrama uyğun olaraq, noyabrın 14, 15 və 16-da idmançılar üçün əyləncəli-maarifləndirici fəaliyyətlər və ustad dərsləri təşkil olunub. Noyabrın 17-dən isə idmançılar şəhər mərkəzində quraşdırılan səhnədə nümunəvi çıxışlar edirlər. Azərbaycan Kanoe və Avarçəkmə Federasiyası “İdman festivalı-2022”də 5 idmançı, 1 məşqçi ilə təmsil olunur. Xüsusi ayrılmış guşədə idmançılarımız avarçəkməyə aid müxtəlif trenajor qurğularında çıxışlar nümayiş etdirirlər. Həmçinin akademik, kayak və kanoe qayıqları nümayiş olunur. Yerli sakinlər arasında avarçəkmə idman növü böyük maraqla qarşılanıb. Festival noyabrın 19-da başa çatacaq. Qeyd edək ki, festivalın keçirilməsində əsas məqsəd idman növlərinə gənclərdə maraq oyatmaq, idmançılar arasında ünsiyyəti daha da yaxşılaşdırmaqdır.

Xəbər 342 dəfə oxundu.