Daha üç sərbəst güləşçimiz U-23 dünya çempionatında mübarizəyə qoşulacaq

Bu gün Azərbaycanın daha üç sərbəst güləşçisi İspaniyanın Pontevedra şəhərində keçirilən U-23 dünya çempionatında mübarizəyə qoşulacaq. Güləşçimiz İntiqam Vəlizadə (61 kq) təsnifat mərhələsində Oşanda Samaradivakara (Şri-Lanka), Xadjimurad Qadjiyev (74 kq) isə kolumbiyalı Sebastyan Rodrigeslə üz-üzə gələcək. Dünya çempionatında 125 kiloqram çəki dərəcəsində mübarizə aparacaq təmsilçimiz Vaxit Qalayev səkkizdəbir finalda Georgi İvanov (Bolqarıstan) ilə qarşılaşacaq. Bu gün, həmçinin Tofiq Əliyev (57 kq) təsəlliverici görüşdə ukraynalı Kamil Kərimov, Kənan Heybətov (70 kq) isə Lahiru Vadige (Şri-Lanka) ilə üz-üzə gələcək. Millimizin üzvü İslam İlyasov (97 kq) bürünc medal uğrunda Mucahit Çelik (Türkiyə) - Andro Marqişvili (Gürcüstan) cütünün qalibi ilə gücünü sınayacaq. Qeyd edək ki, daha əvvəl yunan-Roma güləşçilərindən Nihad Quluzadə (55 kq) və Nihat Məmmədli (60 kq) gümüş, Qurban Qurbanov (72 kq) isə qızıl medal qazanıb. Qadın güləşçilərdən isə Nigar Mirzəzadə (65 kq) gümüş medala sahib çıxıb.

Xəbər 305 dəfə oxundu.