Bakıda Xüsusi Olimpiya üzrə məşqçilik və hakimlik kursları təşkil olunub

Milli Gimnastika Arenasında Azərbaycan Gimnastika Federasiyasının təşkilatçılığı ilə Azərbaycan Dövlət Bədən Tərbiyəsi və İdman Akademiyası tərəfindən Xüsusi Olimpiya üzrə məşqçilik (bədii gimnastika, gimnastika hamı üçün) və hakimlik (bədii gimnastika) kursları keçirilib. Xüsusi Olimpiya üzrə yunanıstanlı mütəxəssis Sofiya Buranın rəhbərliyi altında tədris edilən kurslarda 9 məşqçi iştirak edib. Nəzəri və təcrübi məşğələlərin keçirildiyi kursların təşkilində məqsəd Xüsusi Olimpiya Hərəkatı üzrə bilik və bacarıqların artırılması, bu sahədə ixtisaslı kadrların hazırlanması olub. “Məşğələlərin təşkilində məqsəd yerli mütəxəssislərin Xüsusi Olimpiya üzrə beynəlxalq səviyyədə bilik və bacarıqlara sahib olmaları, bu sahənin incəliklərini dərindən mənimsəmələridir”, - deyə yunanıstanlı mütəxəssis bildirib. Qeyd edib ki, Azərbaycanda bədii gimnastika kifayət qədər inkişaf edib. Gimnastika hamı üçün növü də inkişaf mərhələsindədir. S.Bura kursların keçirilməsi üçün Milli Gimnastika Arenasında yüksək səviyyəli şəraitin mövcud olduğunu da diqqətə çatdırıb. Kursların yekununda mütəxəssislər iştirakçı diplomu ilə təltif olunublar.

Xəbər 305 dəfə oxundu.