Azərbaycan Premyer Liqasının təqvimində dəyişikliklər olub. İdman.com.az saytının məlumatına görə, Peşəkar Futbol Liqası ölkə çempionu “Neftçi”nin Avropa Liqasının qrup mərhələsinə düşməsini nəzərə alaraq, 14 oyunun vaxtında dəyişiklik edib.Avropa Liqasının “Partizan” – “Neftçi” matçı sentyabrın 20-nə təyin olunduğu üçün V turun “Neftçi” – “Xəzər Lənkəran” matçı sentyabr 16-dan 15-nə keçirilib.
Oktyabrın 4-dəki “Neftçi” – “İnter” oyunu isə 3 matçın vaxtının dəyişdirilməsinə səbəb olub. VI turun “Sumqayıt” – “Neftçi” qarşılaşması sentyabrın 25-dən 24-nə, VII turun “İnter” – “Neftçi” görüşü 29-dan 28-nə keçirilib. VIII turun oktyabrın 3-də baş tutmalı olan “Neftçi” – “Turan” matçı 5 gün gec keçiriləcək.
Avropa Liqasının “Rubin” – “Neftçi” matçı oktyabrın 25-nə təyin olunduğundan Premyer Liqanın 2 oyununun vaxtı dəyişib. IX turun “Neftçi” – “Kəpəz” oyunu oktyabrın 20-dən 19-na, X turun “Rəvan” – “Neftçi” qarşılaşması 27-dən 28-nə dəyişdirilib.
Noyabrın 8-də keçiriləcək “Neftçi” – “Rubin” matçı XII turun “Qəbələ” – “Neftçi” oyununa təsir edib. Bu qarşılaşma noyabrın 4-də deyil, 3-də baş tutacaq.
“Neftçi” – “Partizan” görüşü noyabrın 22-də keçirilməli olduğundan XIII turun “Neftçi” – “Sumqayıt” matçı noyabrın 18-də deyil, 1 gün əvvəl baş tutacaq.
Avropa Liqasının son turunun “İnter” – “Neftçi” matçı dekabrın 6-na təyin olunduğu üçün XVI turun “Neftçi” – “Rəvan” oyunu dekabrın 8-dən 10-na keçirilib.
Premyer Liqanın I turunun təxirə salınmış “Neftçi” – “Bakı” qarşılaşması dekabr 18-nə təyin olunub. XVIII turun “Neftçi” – AzAL və “İnter” – “Bakı” matçları isə dekabrın 21-dən 22-nə keçirilib.
IV turun təxirə salınmış AzAL – “Neftçi” matçı isə gələn ilə qalıb. 3-cü dəfə təxirə salınan matç fevralın 13-də baş tutacaq. Bu üzdən 2013-cü il fevralın 10-da baş tutmalı olan XIX turun “Kəpəz” – “Neftçi” görüşü də 1 gün tez baş tutacaq.
Xəbər 1017 dəfə oxundu.