Premyer Liqanın XXII turu “Sabah” üçün yubiley və rekordlarla əlamətdar olub. “Zirə” ilə ev oyununda 3:1 hesabı ilə qalib gələn komanda ölkə çempionatının yüksək dəstəsində öz meydanında 50-ci qola imza atıb. Yubiley qolunu Zurab Oçiqava vurub. Paytaxt təmsilçisi daha iki topla bu rəqəmi 52-yə çatdırıb.“Sabah”ın ikinci qolunun müəllifi Coy-Lens Mikels mövsümdə 9-cu qolunu vurub. O, klub tarixinə bir mövsümdə ən çox qol vuran futbolçu kimi düşüb. Futbolçu 2018/2019-cu il mövsümündə 8 dəfə fərqlənən Marko Deviçi arxada qoyub.
Coy-Lens həm də klub tarixinin Premyer Liqadakı ən məhsuldar futbolçusu adına şərik çıxıb. O, 9 qol vuran M.Deviçə çatıb. Serb əsilli ukraynalı 2018/2019-cu il mövsümündə 8, növbəti çempionatda 1 qola sevinib.
“Sabah” Premyer Liqada bir mövsümə topladığı xal sayında da yeni rekord vurub. Ötən mövsümdə 29 xal yığan Bakı təmsilçisinin aktivində artıq 32 xal var.
Xəbər 230 dəfə oxundu.