Azərbaycanın Macarıstandakı səfirliyinin təşəbbüs və təşkilatçılığı, Azərbaycan Respublikasının Diasporla İş üzrə Dövlət Komitəsinin hərtərəfli dəstəyi ilə paytaxt Budapeşt şəhərində Zəfər Gününə həsr edilmiş "Victory CUP" adlı futzal turniri keçirilib.Turnirdə Macarıstan universitetlərinin tələbələrindən ibarət 8 komanda iştirak edib.
Turnirdə qalib gələn komandanın noyabr ayının sonlarında Azərbaycana səfəri və “Qarabağ” futbol klubunun təlim-məşq toplantılarında, həmçinin oyunlarında iştirakı nəzərdə tutulur.
Diplomatik, idman və turistik xarakter daşıyan layihəyə yerli universitetlər və gənclər tərəfindən böyük maraq göstərilib, komandalar qısa bir zamanda qeydiyyatdan keçiblər.
Macarıstanın aparıcı futbol komandalarından biri olan Vasas FK-nın futzalında baş tutmuş turnirdə qalib gələn Eötvöş Lorand Universitetinin komandası ölkəmizin Macarıstandakı səfiri Tahir Tağızadə tərəfindən Zəfər Kuboku ilə mükafatlandırılıb, həmçinin ikinci və üçüncü yerləri tutan Macarıstan Fiziki Universitetinin və Korvinus Universitetinin komandalarına Vasas FK-nın fəxri prezidenti Janos Jako tərəfindən medallar və hədiyyələr təqdim edilib.
Turnirdə çıxış edən T.Tağızadə ölkəmizin ərazi bütövlüyünün bərpa olunmasının beynəlxalq hüquqa hörmətlə yanaşan xalqlar üçün əhəmiyyətini vurğulayıb.
J.Jako isə Azərbaycanın idman sahəsində əldə etdiyi uğurları, dünya və Avropa çempionatlarında, eləcə də Olimpiya oyunlarında qazandığı qızıl medalları qeyd edib.
Turnir üçün xüsusi olaraq hazırlanmış Zəfər Kuboku, medallar və mükafatların üzərində ölkəmizin qələbə rəmzlərindən birinə çevrilmiş Xarıbülbül əks olunub.
Xəbər 390 dəfə oxundu.