London Olimpiadasında qazanılan möhtəşəm qələbə Şamaxıda coşqun sevinclə qarşılanmışdır

Londonda keçirilən XXX Yay Olimpiya Oyunlarında iki azərbaycanlı gəncin ən yüksək pilləyə qalxaraq bir gündə iki qızıl medal qazanmaları Şamaxı ictimaiyyəti, xüsusilə gənclər arasında coşqun sevinclə qarşılanmışdır. Hər kəs Azərbaycan bayrağını yüksəklərə ucaldan sərbəst güləşçilərimiz Toğrul Əsgərov və Şərif Şərifovla fəxr etdiklərini bildirir, bu möhtəşəm qələbəni dövlətimizin başçısı, Milli Olimpiya Komitəsinin prezidenti İlham Əliyevin idmana göstərdiyi diqqət və qayğının nəticəsi kimi dəyərləndirir. Fəxri bədən tərbiyəçisi və idman işçisi, sərbəst güləş üzrə idman ustası Qüdrət Məmmədyarov AzərTAc-ın müxbiri ilə söhbətində güclü rəqibləri üzərində möhtəşəm qələbə qazanaraq qızıl medala sahib çıxan sərbəst güləşçilərimiz Toğrul Əsgərov və Şərif Şərifovla fəxr etdiyini bildirərək demişdir ki, Azərbaycanda ta qədimdən idmanın güləş növünə böyük maraq göstərilir. Bu gün nəinki Bakıda və iri şəhərlərimizdə, habelə rayon mərkəzlərində tikilən Olimpiya İdman kompleksləri, çoxsaylı idman obyektləri idmanın digər növləri ilə yanaşı güləş növünün də inkişafına güclü şərait yaratmışdır. AzərTAc

Xəbər 1058 dəfə oxundu.