Sentyabrın 3-ü gecə saatlarında koronavirusdan dünyasını dəyişən "Neftçi" klubunun sabiq prezidenti Aydın İbrahimov dəfn olunub.O, Bakının "Qurd qapısı" qəbiristanlığında torpağa tapşırılıb.
Mərasimdə Gənclər və idman nazirinin müavini İsmayıl İsmayılov, Müdafiə Sənayesi Nazirliyinin, Milli Olimpiya Komitəsinin və Azərbaycan Güləş Federasiyasının rəsmi şəxsləri iştirak edib.
Qeyd edək ki, Aydın İbrahimov 1988-97-ci illərdə paytaxt təmsilçisinin prezidenti olub.
A.İbrahimov güləş üzrə Avropa və dünya çempionatında qızıl medal qazanıb. O, 1963-cü ildə Bolqarıstandakı mundialda, 1966-cı ildə isə Almaniyada qitə yarışında çempion adına yiyələnib. İbrahimov 1964-cü ildə Yaponiyanın paytaxtı Tokioda keçirilmiş Yay Olimpiya Oyunlarında bürünc medala sahib çıxıb. Nailiyyətlərinə görə SSRİ-nin əməkdar idman ustası, əməkdar məşqçi, beynəlxalq dərəcəli hakim adlarını alıb. O, dünya güləş idman növünün inkişafındakı xidmətlərindən dolayı qızıl medalla təltif edilib. A.İbrahimov bir müddət futbol sahəsində də çalışıb, 1988-1997-ci illərdə “Neftçi” klubunun ilk prezidenti olub.
Prezident İlham Əliyev 2019-cu ilin sentyabrında Aydın İbrahimova Azərbaycan Respublikası Prezidentinin fərdi təqaüdünün verilməsi haqqında sərəncam imzalayıb.
Xəbər 445 dəfə oxundu.