Qadın voleybolçular arasında Avropa çempionatının yarımfinalçıları müəyyənləşib.Türkiyə və Niderland milli komandalarından sonra da iki yığma yarımfinala yüksəlib. İtaliya voleybolçuları rusiyalı rəqiblərini mübarizədən kənarlaşdırıblar. İlk setdə 25:20 hesabı ilə üstün olan Appenin təmsilçiləri ikinci hissədə rəqiblərinə aman verməyiblər. İtaliya millisi bu seti 17 xal fərqi ilə xeyrinə başa vurub. Sonuncu hissədə də təşəbbüsü əldən verməyən italiyalılar 25:15 hesabı ilə qalib gəliblər.
Mərhələnin digər oyununda Serbiya və Fransa seçmələri üz-üzə gəliblər. Qrup mərhələsində Azərbaycan millisinin rəqibləri olmuş bu komandaların dueli Serbiya yığmasının qələbəsi ilə yekunlaşıb. Qarşılaşmanın ilk setini Serbiya millisi 22:25 hesabı ilə uduzsa da, dönüş yarada bilib. Ardıcıl 3 setdə 25:18, 25:7 və 25:20 hesabı ilə qələbə qazanan Serbiya voleybolçuları yarımfinala çıxıblar.
Yarımfinalda Serbiya yığması Türkiyə kollektivi ilə qarşılaşacaq. Digər matçı İtaliya və Niderland seçmələri arasında olacaq. Avropa çempionatın qalibi sentyabrın 4-də müəyyənləşəcək.
Xəbər 335 dəfə oxundu.