Avqustun 17-dən 19-dək Latviyanın paytaxtı Riqada yeniyetmələr arasında cüdo üzrə Avropa birinciliyi keçiriləcək. Bu mötəbər yarışda Azərbaycan 10-u oğlan və 4-ü qız olmaqla, 14 idmançı ilə təmsil olunacaq. Avqustun 11-də Azərbaycan Cüdo Federasiyasında (ACF) qitə birinciliyində ölkəmizin idman şərəfini qoruyacaq milli komandanın üzvləri ilə görüş keçirilib.Tədbirdə ACF-nin baş katibi Elmar Babanlı koronavirus pandemiyası başladığı dövrdən indiyədək müəyyən çətinliklərə baxmayaraq, keçirilən məşqlərdən, cüdoçularımızın müxtəlif yarışlarda daim iştirak etməsindən, qazanılan uğurlardan söhbət açıb və həmin yarışlardan qarşılıqlı təhlillər aparılıb. O, həmçinin milli üzvlərinin bu nüfuzlu yarışa hazırlıq məqsədi ilə keçdiyi təlim-məşq toplanışlarından və federasiyanın daim göstərdiyi qayğıdan bəhs edib. Baş katib sonda ACF-nin rəhbərliyi adından idmançılarımıza qarşıdan gələn yarışlarda uğurlar arzulayıb.
Görüş zamanı milli komandamızın yeni məşq və idman geyim dəstləri cüdoçularımıza nümayiş etdirilib. Sonra məşqçi, idmançı və texniki heyətə yeni idman geyimləri təqdim olunub.
Məşqçilər və idmançılar yeniyetmələri daim diqqət mərkəzində saxladığına və göstərdiyi qayğıya görə federasiya rəhbərliyinə minnətdarlıqlarını bildiriblər.
Xəbər 359 dəfə oxundu.