İyulun 2-də İsveçrə - İspaniya oyunu ilə futbol üzrə Avropa çempionatının dörddəbir final mərhələsinə start veriləcək.Sankt-Peterburqda oynanılacaq görüş Bakı vaxtı ilə saat 20:00-da başlayacaq. Matçı ingiltərəli referi Maykl Oliver idarə edəcək.
İsveçrə yığması səkkizdəbir finalda sonuncu dünya çempionu Fransanı mübarizədən kənarlaşdırıb. Həmin görüşdə əsas vaxt 3:3 hesabı ilə başa çatdığından 11 metrlik cərimə zərbələri seriyasında İsveçrə komandası 5:4 hesabı ilə qalib gəlib. İspaniya isə sonuncu dünya çempionatının gümüş mükafatçısı Xorvatiyanı 5:3 hesabı ilə məğlub edərək dörddəbir finala yüksəlib.
Günün sonuncu görüşündə turnirin əsas favoritləri - Belçika və İtaliya komandaları üz-üzə gələcəklər. Münxendə baş tutacaq qarşılaşma Bakı vaxtı ilə saat 23:00-da start götürəcək. Görüşün baş hakimi sloveniyalı Slavko Vinçiç olacaq.
İtaliya millisi səkkizdəbir finalda Avstriyanı (3:1), Belçika seçməsi isə sonuncu Avropa çempionu Portuqaliyanı (1:0) məğlub edib.
Bu görüşlərdə qalib gələn komandalar yarımfinalda üz-üzə gələcəklər.
Dörddəbir final mərhələsinin digər iki görüşündə Çexiya millisi Bakı Olimpiya Stadionunda Danimarka, Ukrayna isə Romadakı “Olimpiko” stadionunda İngiltərə seçməsi ilə qarşılaşacaqlar. Bakıdakı oyun saat 20:00-da, Ukrayna-İngiltərə matçı isə saat 23:00-da başlayacaq.
“Avro-2020”nin yarımfinal mərhələsinin görüşləri iyulun 6-7-də, final matçı isə iyulun 11-də keçiriləcək. Yarımfinal və final görüşlərinə Londondakı “Uembli” stadionu ev sahibliyi edəcək.
Xəbər 361 dəfə oxundu.