AMPK-nın prezidenti İlqar Rəhimov və IBSA-nın idman direktoru Yanoş Tardoş arasında görüş olub | |
Azərbaycan Milli Paralimpiya Komitəsinin (AMPK) prezidenti İlqar Rəhimov və Beynəlxalq Görmə Məhdudiyyətli İdmançılar Assosiasiyasının (IBSA) idman direktoru Yanoş Tardoş arasında görüş olub. AMPK-da keçirilən görüşdə Bakıda təşkil olunacaq paracüdo üzrə Qran-Pri yarışlarına hazırlıq barədə müzakirələr aparılıb. Komitə prezidenti İ.Rəhimov bildirib ki, belə mötəbər tədbirin yenidən Bakıda baş tutması sevindirici haldır. Qran-Prinin yüksək səviyyədə keçirilməsi üçün təşkilat komitəsi yaradılıb. Hazırlıq işləri yaxın günlərdə tam yekunlaşacaq. İ.Rəhimov turnirin ölkəmizdə tətbiq edilən mövcud karantin qaydalarına, sanitar-epidemioloji tələblərə uyğun olaraq və tamaşaçıların iştirakı olmadan keçiriləcəyini vurğulayıb. Komitənin baş katibi Kamal Məmmədov görüş zamanı yarışa gələcək qonaqların məskunlaşacağı yer, Qran-Prinin keçiriləcəyi Heydər Əliyev adına İdman Sarayı, eləcə də idmançılar üçün təşkil olunacaq tibbi təsnifata olan hazırlıq barədə məlumat verib. IBSA-nın idman direktoru Y.Tardoş komitə rəhbərliyinə dəvət üçün təşəkkürünü bildirib. O, AMPK-nın IBSA ilə əməkdaşlığını yüksək qiymətlərərək deyib ki, Qran-Prinin yüksək səviyyədə təşkil olunması üçün təşkilat komitəsinə öz dəstəyini verəcək. Daha sonra tərəflər gələcək əməkdaşlıq ilə bağlı bir sıra məsələləri müzakirə ediblər. Qeyd edək ki, mayın 25-26-da Bakıda keçiriləcək Qran-Pri “Tokio-2020” XVI Yay Paralimpiya Oyunlarına reytinq xalı qazandırır. |
|
Xəbər 366 dəfə oxundu. |
|
|