Dieqo Kosta Silva: “Qəbələ”də çempion olmaq üçün hər şərait yaradılıb - MÜSAHİBƏ

“Qəbələ”nin yeni transferi Dieqo Kosta Silva klubunun rəsmi saytına müsahibə verib. İdman.com.az saytının məlumatına görə, Portuqaliyanın yüksək liqa təmsilçisi “Vitoriya” klubundan gələn braziliyalı legioner özünü növbəti mövsümdə qarşısına böyük hədəflər qoyan “Qəbələ”nin ayrılmaz hissəsi hesab etdiyini bildirib. - İki həftədən artıqdır ki, “Qəbələ”nin üzvüsən. Yeni komandan haqda təəssüratlarını bilmək maraqlı olardı... - İndiyə kimi yeni komandamla bağlı gördüklərim ən xoş sözlərə layiqdir. Şəraitdən sözün həqiqi mənasında zövq alıram. “Qəbələ” yeni klub olsa da, infrastrukturu sürətlə inkişaf edir. Bu cür şərait peşəkar, yüksək səviyyəli futbolçular yetişdirməyə imkan verir. - Hazırlıqlarınız necə gedir? - Hər şey qaydasındadır. Bütün kollektiv səylə çalışır. Hər kəs üzərinə düşən məsuliyyəti dərk edir. Çempionatda istədiyimiz nəticəni əldə etmək üçün fiziki və taktiki cəhətdən hazır olmalıyıq. Gün keçdikcə ideal hazırlıq səviyyəsinə biraz daha yaxınlaşdığımızı hiss edirik. - Komandadakı daxili ab-hava necədir? - Özümü çox pozitiv hiss edirəm. Bu bütün futbolçularda belədir. Hamı bir-birinə müsbət enirji verir. “Qəbələ” klubun gələcəyini düşünən, onun inkişafına səy göstərən insanlardan təşkil olunub. - Komanda daxilindən söz düşmüşkən özünə arxada qoyduğumuz qısa müddət ərzində dost tapa bilmisən? - Biz ailə kimiyik. Kollektivə qoşulduğum gündən hamı uyğunlaşmaqda mənə kömək edib. Komandada daha 3 braziliyalı – Dodo, Daniel Kruz və Bruno da Silva olduğuna görə ilk gündən heç bir çətinliyim olmadı. Artıq onlarla yaxın dostam. O cümlədən yerli və əcnəbi futbolçular da adaptasiya prosesində yardımçı olublar. Onlarla rahat anlaşa bilirəm. Təbii ki, bu prosesin sürətlə inkişafında məşqçilər korpusunun əməyini də unutmaq olmaz. - “Qəbələ”nin bu mövsüm qarşısına qoyduğu məqsədlərdən xəbərdarsan. Fikrincə komanda bu məqsədinə - çempionluq hədəfinə çata biləcək? - Futbol təcrübəmə əsaslanaraq onu deyə bilərəm ki, “Qəbələ”də çempion olmaq üçün həm infrastruktur baxımdan, həm də peşəkarlıq baxımından hər cür şərait yaradılıb. Lakin biz istədiyimiz hədəfə çatmaq üçün çox çalışmalı, klubun bütün üzvləri ilə qüvvələrimizi birləşdirməliyik. Hər kəs qələbəyə köklənməlidir, qələbə ab-havasında olmalıdır. Bütün kollektiv çempionluğun mümkünlüyünə inanmalıdır. Yalnız bundan sonra biz çempionluğu əldə edə biləcəyik.

Xəbər 1316 dəfə oxundu.