Xorvatiya klubu koronavirus səbəbindən Çempionlar Liqasında mübarizəni dayandırıb
Voleybol üzrə Çempionlar Liqasında kişilərin yarışında çıxış etməli olan Xorvatiyanın “Mladost” komandası artıq mübarizəni dayandırıb.

Buna həmin klubun heyətində koronavirusa yoluxan oyunçunun aşkarlanması səbəb olub. Belə ki, “A” qrupunda I dövrənin oyunlarını qəbul etməli olan Zaqreb təmsilçisi yarışa qatılmayacaq. Xorvatiyalıların “Erzeni” (Albaniya) və “Kapoşvar”la (Macarıstan) hər iki dövrədəki görüşləri ləğv olunub. Nəticədə “A” qrupunda qalib elə bu iki komanda arasında görüşlərdə müəyyənləşəcək.

Qeyd edək ki, qadın voleybolçulardan ibarət Azərbaycan millisinin üzvü Marqarita Əzizovanın çıxış etdiyi Belarusun “Minçanka” klubu da eyni səbəbdən Çempionlar Liqasında mübarizəni dayandırıb. “Mladost”dan fərqli olaraq, “Minçanka” mübarizəni CEV kuboku yarışlarında davam etdirəcək.

Xəbər 411 dəfə oxundu.