Bu gün Azəbaycan idman pedaqogikasının görkəmli nümayəndəsi, Əməkdar bədən tərbiyəsi və idman xadimi, Fəxri bədən tərbiyəsi və idman işçisi, Bədən Tərbiyəsi və İdman Əlaçısı, Azərbaycan Dövlət Bədən Tərbiyəsi və idman Akademiyasının professoru, pedaqogika üzrə elmlər doktoru Dilqəm Quliyevin 70 yaşı tamam olur.Onun idmana gəlişi hərbi xidmət illəri ilə bağlı olub. 1967-ci ildə Naxçıvanın Şərur rayonunun Şaxtaxtı kənd orta məktəbini bitirdikdən sonra, Rusiyanın Lipetsk şəhərində keçirdiyi hərbi xidmətdən beşnövçülük üzrə idman ustası kimi dönən Dilqəm 1972-1974-cü ildən Naxçıvanın “Spartak” könüllü idman cəmiyyətində sərbəst güləş üzrə məşqçi vəzifəsində çalışıb.1978-ci ildə Azərbaycan Dövlət Bədən Tərbiyəsi İnstitutunun (indiki Azərbaycan Dövlət Bədən Tərbiyəsi və İdman Akademiyası) pedaqoji fakültəsini fərqlənmə diplomu ilə bitirdikdən sonra, institutun güləş və onun metodikası kafedrasında baş laborant vəzifəsində saxlanılan Dilqəm Quliyev, bundan 5 il sonra oradakı fəaliyyətini müəllim kimi davam etdirib, 1990-cı ildə isə baş müəllim təyin edilib. 1991-ci ildən başlayaraq, düz 10 il, Azərbaycan Dövlət Bədən Tərbiyəsi və İdman Akademiyasının tərbiyə işləri üzrə prorektoru vəzifəsində çalışıb. 2015-ci ilə kimi ADBTİA-nın idman işləri və xarici əlaqələr üzrə prorektoru vəzifəsini yerinə yetirib.
Dilqəm Quliyev pedaqoji fəaliyyətini paralel olaraq praktiki şəkildə də davam etdirib. 38 illik məşqçiliyi dövründə onun Akademiyadakı tələbələrindən 6 nəfəri Əməkdar idman ustası adına layiq görülüb. 76-sı Beynəlxalq dərəcəli idman ustası, 1591-i idman ustası, 1673 nəfəri idman ustalığına namizəddir. Onların arasında dünya, Avropa çempionları və mükafatçıları var.
D.Quliyevin respublikamızda milli güləşin təbliğində, habelə milli xalq oyunlarının əhali arasında yayılmasmında xidmətləri böyükdür. Radio, televiziya və dövrü mətbuatda müxtəlif çıxışları və yazıları ilə xalq oyunlarını, habelə milli güləşin qədim köklərini, bədən tərbiyəsi və idmanın inkişaf tarixini geniş təbliğ edir, bu növlər üzrə yarışların fəal təşkilatçısı olmaqla yanaşı, yarışları idarə edən hakimlər sırasında təmsil olunur. Onu da qeyd edək ki, Dilqəm müəllimin hakimlik təcrübəsi də var. SSRİ və respublika miqyasında keçirilən milli və sərbəst güləş yarışlarında hakimlik edib.
Dilqəm Quliyev ömrünün böyük bir hissəsini idmanda elmi pedaqogikanın inkişafına, Azərbaycanın idman tarixinin tədqiqinə həsr edib və hazırda bu istiqamətdə fəaliyyətini davam etdirir. Dilqəm Quliyev Azərbaycan Yazıçılar Birliyinin və Azərbaycan Jurnalistlər Birliyinin üzvüdür. 2000-ci ildən Ali Attestasiya Komissiyasının qərarı ilə dissertant və aspirantlara elmi rəhbər olmaq səlahiyyəti aldıqdan sonra, professor Dilqəm Quliyev yüksək ixtisaslı kadrların hazırlanması ilə daha ciddi şəkildə məşğul olmağa başlayır və indiyə kimi 27 nəfərin elmi rəhbəri olub, 2 nəfərin namizədlik dissertasiyasına opponentlik edib. O, 300-ə yaxın elmi-pedaqoji məqalələrin, 100-dən artıq kitabın müəllifidir. İndiyə kimi 8 dərslik, 25 monoqrafiya, 16 dərs, 7 tədris, 21 metodik vəsait, 10 metodiki göstəriş, 3 metodiki tövsiyə hazırlayıb. İnternet saytında Azərbaycanın idman tarixinin tərtibatçısı, Azərbaycan Dövlət Bədən Tərbiyəsi və İdman Akademiyasının yubileyləri münasibətilə hazırlanan salnamələrin, Azərbaycan Milli Ensiklopediyasının bədən tərbiyəsi və idman bölməsinə daxil edilən məqalələrin müəllifidir. Onun məqalələri Polşada, Rusiyada, Yunanıstanda, Bolqarıstanda, Türkiyədə və başqa ölkələrdə çap olunub.
Dilqəm mülləmin ictimai-kütləvi fəaliyyəti də əhatəliyi, genişliyi ilə diqqətə layiqdir. Azərbaycan Olimpiya Akademiyasının “Kütləvi idman” bölməsinin sədri, Azərbaycan DBTİA-nin “İdmançı” qəzetinin baş redaktoru, Gənc Vətənpərvərlər Birliyinin ABTİA dayaq mərkəzinin sədri, Azərbaycan Respublikası Təhsil Nazirliyinin elmi metodika şurasının sədr müavini, Azərbaycan Dövlət Bədən Tərbiyəsi və İdman Akademiyasının “Elmi xəbərlər” jurnalının baş redaktorunun müavini, “OlimpSport” jurnalının fəxri redaksiya heyətinin üzvü, milli təhsil sistemində fiziki tərbiyə və çağrışaqədərki hazırlıq fənlərinin tədris problemləri bölməsinin sədridir.
Dilqəm müəllimin Azərbaycanda idman pedaqogikasının inkişafındakı və ümumiyyətlə görkəmli ictimai xadim kimi nailiyyətləri dövlət tərəfindən yüksək qiymətləndirilərək, o, 2001-ci ildə dövlət başçısının sərəncamı ilə “Tərəqqi” medalına layiq görülüb. ADBTİA-nın 85 illik yubileyi münasibəti ilə Azərbaycan Respublikası Gənclər və İdman Nazirliyi tərəfindən bədən tərbiyəsi və idman sahəsində kadr hazırlığındakı xidmətlərinə görə Fəxri fərmanla təltif olunub. 2018-ci ildə Azərbaycan Respublikası Gənclər və İdman Nazirliyi tərəfindən “İlin elm adamı” fəxri ada layiq görülüb. Bu mükafatlar sırasında “General Həzi Aslanov” adına Fəxri fərman; “Kamil sənətkar” Fəxri diplomu, “İnam və şərəf” diplomu; “Azərbaycan bayrağı” mükafatı, “Nurlu qələm ustası”; “Qızıl qələm” media mükafatı da var.
Bu gün də Dilqəm Quliyev fəal həyat mövqeyini davam etdirməkdədir. Elmi axtarışlara, araşdırmalara həvəsi tükənməzdir. İnanırıq ki, daha böyük uğurlar hələ qarşıdadır.
Xəbər 719 dəfə oxundu.