“Chessable Masters”: Maqnus Karlsen və Yan Nepomnyaşi ilk 3 partiyanı qələbə ilə başa vurublar

İyunun 25-də norveçli dünya çempionu Maqnus Karlsenin təşkilatçılığı ilə rapid üzrə keçirilən seriya turnirinin üçüncü mərhələsində — “Chessable Masters” yarışında dörddəbir final oyunlarının ilk partiyaları oynanılıb. Yarışda ilk 3 partiyada rusiyalı şahmatçı Yan Nepomnyaşi həmyerlisi Vladislav Artemyev, M.Karlsen isə amerikalı Fabiano Karuana üzərində 2,5:0,5 hesabla qələbə qazanıblar. Dörddəbir finalın digər iştirakçıları çinli Liren Dinq ABŞ-ın daha bir təmsilçisi Hikaru Nakamura, rusiyalı zəka ustası Aleksandr Qrişuk isə hollandiyalı Aniş Giri ilə mübarizə aparacaq. Yarımfinal oyunları iyunun 30-dan iyulun 2-dək, final görüşləri isə iyulun 3-dən 5-dək baş tutacaq. Qeyd edək ki, “Chessable Masters” turnirinin B qrupunda mübarizə aparan Azərbaycan şahmatçısı Teymur Rəcəbov yarışda iştirakını dayandırıb. Turnirin mükafat fondu 150 min ABŞ dollarıdır. Xatırladaq ki, beş yarışdan ibarət seriya turnirinin birinci mərhələsinin - “Magnus Carlsen Invitational” yarışının qalibi M.Karlsen olub. İkinci mərhələdə - “Lindores Abbey Rapid Challange” turnirində isə rusiyalı şahmatçı Daniel Dubov qələbə qazanıb. Seriya çərçivəsində növbəti mərhələ - “Legends of Chess” iyulun 21-dən avqustun 5-dək təşkil ediləcək. Avqustun 9-dan 20-dək isə böyük final keçiriləcək.

Xəbər 588 dəfə oxundu.