Soçidə iki Formula 1 Qran-Prisi təşkil edilə bilər

Formula 1-in Avropadakı Qran-Prilərinin təqvimi müəyyənləşsə də, bəzi yarışların taleyi hələ də sual altındadır. Bunun da səbəbi təşkilatçı ölkələrdəki karantin rejimi ilə əlaqədardır. Onların arasında Rusiya da var. Formula 1 rəhbərliyi Asiya və Amerika qitələrindəki Qran-Prilərdən əvvəl Avropada daha bir neçə mərhələni təşkil etməyə maraq göstərir. İndiki məqamda, yarışların Avstriya, Macarıstan, Böyük Britaniya, İspaniya, Belçika və İtaliyada keçiriləcəyi planlaşdırılır. Siyahıya Azərbaycanla Rusiya da əlavə edilə bilər. Sadəcə, ölkəmizdəki karantin rejimi ilə əlaqədar konkret qərar qəbul olunmayıb. Oxşar vəziyyət Rusiyada da qalmaqdadır. Amma Almaniya mətbuatının məlumatına görə, rusiyalılar Soçidə iki Qran-Pri keçirməkdə maraqlıdır. Hazırda bu ölkədə koronavirusa gündəlik yoluxanların sayı minimum 8 min nəfər olsa da, sentyabrda vəziyyətin qaydasına düşəcəyinə inam böyükdür. Həm də ki, Soçidəki şərait yarışı yüksək səviyyədə keçirməyə imkan verir. Məhz buna görə rusiyalılar həmin şəhərdə ardıcıl iki yarış təşkil etmək fikrindədirlər. Almaniya mətbuatı Sinqapur və Yaponiya Qran-Prilərinin ləğv oluna biləcəyini də vurğulayıb. Səbəb kimi təşkilatçıların yarışı azarkeşsiz keçirmək istəməməsi göstərilir. Vyetnam Qran-Prisinin taleyi də sual altındadır. Belə ki, Formula 1 rəhbərliyi payızda hava şəraitinə görə Hanoyda yarış keçirmək niyyətində deyil.

Xəbər 492 dəfə oxundu.