Atletika üzrə Azərbaycan millisi məşqləri bərpa edib
İyunun 3-də atletika üzrə Azərbaycan milli komandasının açıq havada məşq keçirilib.

Məşqlərə milli komandanın baş məşqçisi Bəhruz Salehli, tullanmalar üzrə məşqçi Ziyad Xəlfəyev və qaçış üzrə məşqçi Ceyhun Hüseynovun rəhbərlik edib.

Avropa çempionu Nazim Babayev məşq prosesindən danışaraq deyib: “Karantin dövründə dəniz kənarında və insanların olmadıqları yerlərdə məşq edirdim. Artıq komandamızın məşqləri başlayıb. Üç gündür Azərbaycan Dövlət Bədən Tərbiyəsi və İdman Akademiyasının stadionunda məşq edirik. Özümü qarşıdakı yarışlara hazırlayıram. Növbəti aylardan sərhədlər açılsa, beynəlxalq yarışlara qatılacağıq”.

“Tokio-2020” Yay Olimpiya Oyunlarının təxirə salınmasından heç bir məyusluq hissi keçirmədiyini vurğulayan çempion bildirib: “Fevralda Olimpiadaya lisenziya qazandım və düşünürdüm ki, altı aydan sonra yarışda iştirak edəcəyəm. Lakin Olimpiya Oyunlarının koronavirus pandemiyası ilə əlaqədar təxirə salınmasına görə bir ildən artıq müddətdə yarışa hazırlaşacağam. İnanıram ki, “Tokio-2020” Olimpiya Oyunlarınadək öz üzərimdə işləyəcəyəm və bütün çatışmazlıqları aradan qaldıracağam”.


Avropa çempionunun məşqçisi Ziyad Xəlfəyev isə qeyd edib ki, stadiona idmançılar gəldikləri zaman tibbi maskadan istifadə edirlər və məşqlər zamanı sosial məsafənin saxlanılması barədə tələblərə riayət olunur. Avqustun 20-də Macarıstanda keçiriləcək yarışa dəvət aldıqlarını vurğulayan mütəxəssis həmin yarışda N.Babayevin uğur qazanacağına ümidvar olduğunu deyib.

Xatırladaq ki, Nazirlər Kabineti yanında Operativ Qərargah mayın 31-dən açıq məkanlarda idman yarışlarının keçirilməsinə icazə verib.

Xəbər 566 dəfə oxundu.