FİDE-nin baş direktoru, keçmiş bakılı Emil Sutovskinin en.chessbase.com saytında müsahibəsi dərc olunub.Azsport.az saytı xəbər verir ki, FİDE-nin son zamanlar keçirdiyi bir sıra tədbirlərdən danışan Sutovski müsahibəni götürən Saqar Şahın Teymur Rəcəbovun namizədlərin turnirindən kənar qalması ilə bağlı sualını da cavablandırıb.
Sutovski deyib: “Rəcəbovla bağlı vəziyyət bizə tam aydındır. İnanırıq ki, praktiki və hüquqi olaraq işləri düzgün gördük. Praktiki olaraq, turnirin çox vacib ilk dövrəsini keçirə bildik. Təəssüf ki, o vaxt Rusiya hökumətinin qəbul etdiyi qaydalara görə daha çox şey edə bilmədik. Əlbəttə, bunları qabaqcadan görə bilmədik, amma bütün oyunçuların təhlükəsizliyini təmin etmək üçün əlimizdən gələni etdik və bu mövzuda xoşagəlməz hallar olmadı. Bu qərarı qəbul etdiyimiz anda hər şey əsaslandırılmışdı. Lakin təəssüf ki, bütün məlumatlara sahib deyildik. Buna görə qərar olduğu kimi qəbul edildi. Geriyə baxıb “bunun olacağını bilirdim” söyləmək çox asandır. Bir çox hallarda insanlar bu baş verməyibsə, bildiklərini xatırlamırlar. Ancaq eyni zamanda Rəcəbov namizədlər sırasında şəksiz yer qazanmışdı və turnirdə oynamağa layiq idi. Narahatlıqları da çox real idi, demək istərdim ki, bunlar sadəcə bəhanələr deyildi”.
Hüquqi cəhətdən bizdə hər şey qaydasındır. Bu vəziyyətlə bağlı bir daha vəkillərimizə müraciət etdik. FİDE-dəki işimiz ədalətli olmağa çalışmaq prinsipinə söykənir. Buna görə də biz Rəcəbovun 2022-ci il namizədlər turnirinə buraxılmasını düşünürük. Ancaq biz hansısa qəribə şəkildə onu indiki turnirə daxil edə bilmərik. İlk dövrə başa çatdıqdan sonra oyunçularla müzakirə edib qərara gəldik ki, yarış eyni xallarla, eyni heyətlə davam edəcək.
Xəbər 722 dəfə oxundu.