AMADA iki aylıq onlayn təhsil proqramına start

Koronavirus pandemiyası həyatımıza çağırışlarla yanaşı, yeni nizam və reallıqlar da gətirib. İdman qurumları və təhsil institutlarının müvəqqəti bağlanması ilə əlaqədar idmançılar, məşqçilər və media üzvlərinin bu dövrdən faydalı yaralanması üçün Azərbaycan Milli Antidopinq Agentliyi (AMADA) xüsusi onlayn təhsil və maarifləndirmə proqramı hazırlayıb. İki ay davam edəcək proqram antidopinq proqramının müxtəlif istiqamətlərini əhatə etməklə yanaşı, COVID-19 pandemiyası dövründə idmançıları ən çox narahat edən suallara interaktiv formada cavab vermək imkanı yaradacaq. Proqram vebinar, sual-cavab oyunları və müxtəlif mövzular ətrafında müzakirələr formatında keçiriləcək. “COVID-19 və antidopinq fəaliyyəti” mövzusunda keçirilən vebinarla start götürən bu onlayn proqram iyunun sonunadək davam edəcək. İdmançılar, məşqçi heyəti və adi istifadəçilər üçün açıq keçirilən birinci vebinar zamanı COVID-19 dövründə dopinq testlər, idmançıların məkan məlumatları, terapevtik istifadə üçün istisnalar (Tİİ) və digər mövzular müzakirə olunub. Növbəti günlərdə AMADA tərəfindən təqdim olunacaq vebinarlarda idmançıların hüquq və öhdəlikləri, qida əlavələrinin yaratdığı risklər, qadağan edilmiş maddələr və üsulların siyahısı müzakirə olunacaq. Qeyd edək ki, vebinarlar barədə AMADA-nın “Facebook” və “Instagram” səhifələrində əvvəlcədən elan yerləşdiriləcək. Bütün vebinarlar Azərbaycan dilində “Microsoft Teams” platforması üzərində keçiriləcək.

Xəbər 639 dəfə oxundu.