UEFA Çempionlar Liqasının qrup mərhələsinə vəsiqə qazanan üç klubun adı müəyyənləşib

Avqustun 27-də UEFA Çempionlar Liqasının 2019-2020-ci il mövsümünün qrup mərhələsinə vəsiqə qazanan üç klubun adı müəyyənləşib. Səfərdə 0:4 hesabı ilə məğlub olan Rusiyanın “Krasnodar” klubu doğma meydanda Yunanıstanın “Olimpiakos” klubuna ikinci dəfə məğlub olub - 1:2. İsveçrənin “Yanq Boyz” klubu Serbiyada “Srvena Zvezda” ilə 1:1 hesablı heç-heçə edib. İki oyunun nəticəsinə əsasən Serbiya təmsilçisi qrup mərhələsinə vəsiqə qazanıb. Bu klublar arasında İsveçrədə baş tutan görüşdə qalib müəyyənləşməyib - 2:2. Günün üçüncü qarşılaşması isə Norveçdə oynanılıb. “Rusenborq” Xorvatiyanın “Dinamo” kollektivini qəbul edib. Görüş 1:1 hesabı ilə yekunlaşıb. Bu klublar arasında ilk qarşılaşma 2:0 hesabı ilə Xorvatiya təmsilçisinin xeyrinə başa çatıb. Beləliklə, “Srvena Zvezda”, “Olimpiakos” və “Dinamo” qrup mərhələsinə vəsiqə qazanıb. Qeyd edək ki, mərhələnin digər üç oyunu avqustun 28-də keçiriləcək. Belə ki, “Ayaks” – APOEL (0:0), “Brügge” – LASK (1:0) və “Slavia Praqa” – “ÇFR Kluj” (1:0) qarşılaşmaları oynanılacaq. Qitənin ən nüfuzlu klub turnirinin qrup mərhələsinin püşkatma mərasimi avqustun 29-da Monakoda olacaq.

Xəbər 729 dəfə oxundu.