Bakıda keçirilən ikinci beynəlxalq həmrəylik tennis çempionatının üçüncü gününə yekun vurulub
Bakıda keçirilən ikinci beynəlxalq həmrəylik tennis çempionatının üçüncü günündə - iyulun 25-də azarkeşlər gərgin idman mübarizəsinin şahidi olublar.

Azərbaycanın iki tennisçisi fərdi yarışlarda mübarizə aparıb. Hər iki tennisçimizin rəqibləri Qırğızıstan idmançıları olub. Umayra Həşimova Kseniya Palkina, Alina Qavriş isə Sara Kunakunovaya uduzublar.

Tennisçilərimiz cütlüklərin yarışında da qüvvələrini sınayıblar. Qız cütlüklərin yarışında Alina Qavriş-Umayra Həşimova Səudiyyə Ərəbistanından olan Yara Alhaqbani-Arij Fareh, Züleyxa Səfərova-Anjelika İsayeva (Rusiya) tandemi isə bəhreynli Safa Hajı-Redha Nazlı duetindən üstün olub.

Digər görüşlərə gəlincə, Ülviyyə Süleymanova-Taxmina Aşurmatova (Tacikistan) cütlüyü isə Selin Lidya Sepkin-Lara Biter (hər ikisi Türkiyə) duetinə uduzub. Oğlanların mübarizəsində isə Azərbaycan cütlüyü Orxan Manaflı-Rəsul Qocayev iraqlı tennisçilər Ali Casim Davud Saud və Adil Mustafa Abdulkerim Al-Saedi ilə görüşdən məğlub ayrılıblar.

İyulun 27-dək davam edəcək yarışda Azərbaycan tennisçiləri ilə yanaşı, Albaniya, Bəhreyn, Belarus, İraq, Qırğızıstan, Maldiv adaları, Mozambik, Rusiya, Səudiyyə Ərəbistanı, Liviya, Seneqal, Tacikistan, Türkiyə və Uqanda idmançıları birincilik uğrunda mübarizə aparırlar.

Çempionat Azərbaycan Milli Olimpiya Komitəsi (MOK) ilə İslam Həmrəyliyi İdman Federasiyası (İHİF) arasında imzalanan memorandum əsasında təşkil olunub. Memorandum "Bakı-2017" IV İslam Həmrəyliyi Oyunlarının irsini davam etdirmək, İslam mədəniyyətini və idmanı gənclərə aşılamaq məqsədilə imzalanıb. Hədəf İHİF-ə üzv ölkələrin idmançıları arasında İslam həmrəyliyini möhkəmləndirmək, ən yüksək idman dəyərlərini və prinsiplərini qoruyub saxlamaq, müsəlman ölkələrində idman və Olimpiya hərəkatını, gənclər arasında birlik və qardaşlığı təbliğ etməkdir.

Bakı Tennis Akademiyasında təşkil olunan çempionatda 14 və daha yuxarı yaş kateqoriyasına aid idmançılar iştirak edirlər. Tennisçilər 4 qrup üzrə yarışırlar.

Çempionatın tərəfdaşları Azərbaycan Tennis Federasiyası, Azərbaycan Dövlət İnformasiya Agentliyi (AZƏRTAC), Bakı Tennis Akademiyası, “BİR” Tələbə Könüllü Təşkilatı, İdman Azərbaycan kanalı, “Coca-Cola” və “Toyota” şirkətləridir.

Xəbər 1253 dəfə oxundu.