Çövkən oyunu üzrə “100 İllik Yubiley Kuboku”nun birinci günündə iki görüş keçirilib

Azərbaycan Respublikası Atçılıq Federasiyasının (ARAF) Azərbaycan Xalq Cümhuriyyətinin yaradılmasının 100 illik yubileyi münasibətilə təşkil etdiyi Milli Atçılıq Festivalı çərçivəsində iyunun 5-də çövkən milli atüstü oyunu üzrə “100 İllik Yubiley Kuboku” turnirinə start verilib. Turnirdə səkkiz komanda - “Sərhədçi”, “Polad”, “Köhlən”, “Murad”, “Buta Qolden”, “Omar” kollektivləri ilə yanaşı, Ağstafanın və Ağcabədinin çövkən yığmaları da mübarizə aparırlar. Çövkən oyunu üzrə “100 İllik Yubiley Kuboku” turnirinin birinci günündə iki qarşılaşma oynanılıb. İlk görüşdə “Köhlən” və “Omar” komandaları üz-üzə gəliblər. Maraqlı və gərgin idman mübarizəsi şəraitində keçən görüşdə “Omar” kollektivi 3:2 hesabı ilə qalib gəlib. Digər oyunda isə “Buta Qolden” komandası isə “Murad” kollektivini 4:0 hesabı ilə məğlubiyyətə uğradıb. Yarışın proqramına əsasən, iyunun 6-da təsnifat mərhələsinin digər görüşləri keçiriləcək. İyunun 7-də yarımfinal oyunları təşkil olunacaq. İyunun 9-da isə üçüncü yer uğrunda mübarizə və final oyunları ilə turnirə yekun vurulacaq. Yarışın ümumi mükafat fondu 50 min manatdır. İyunun 2-də start götürən Milli Atçılıq Festivalına bu ayın 17-də yekun vurulacaq. Festivalın birinci günündə Binə Atçılıq Mərkəzində cıdır üzrə “100 İllik Yubiley Kuboku” turniri keçirilib. Festival çərçivəsində iyunun 8-də atçılığın konkur növü üzrə Heydər Əliyev Kuboku turniri təşkil olunacaq. “Elite Horse & Polo Club”un yaşıl arenasında keçiriləcək və iki kateqoriyadan ibarət olacaq turnirin ümumi mükafat fondu 34 min manatdır. İyunun 15-17-də isə Azərbaycan, Almaniya, İrlandiya və Hindistanı təmsil edən klubların iştirakı ilə artıq altıncı dəfə ölkəmizdə arena polo üzrə Dünya Kuboku yarışları keçiriləcək. Üç gün davam edəcək turnirdə ümumilikdə altı oyun olacaq. Azərbaycanı bu mötəbər yarışda milli polo komandasının idmançılarından ibarət “Elite Horse & Polo Club”u təmsil edəcək.

Xəbər 1444 dəfə oxundu.