Çempionlar Liqasınnın səkkizdəbir final mərhələsinə yekun vurulub

Martın 16-da UEFA Çempionlar Liqasının səkkizdəbir final mərhələsi çərçivəsində Fransanın “Monako” komandası İngiltərənin “Mançester Siti”, İspaniyanın “Atletiko” (Madrid) klubu isə Almaniyanın “Bayer” (Leverkuzen) kollektivi ilə cavab oyunu keçiriblər. Bununla da futbol üzrə Çempionlar Liqasınnın səkkizdəbir final mərhələsinə yekun vurulub. Turnirdə keçirilən oyunda Fransanın “Monako” və İngiltərənin “Mançester Siti” komandaları arasındakı görüş kifayət qədər dramatik alınıb. “Knyazlıq klubu” doğma meydanda əzmkarlıq nümayiş etdirərək Mançesterdəki ilk qarşılaşmadakı 3:5 hesablı məğlubiyyətin revanşını alıb - 3:1. “Monako” məhz səfərdə daha çox qol vurduğu üçün dörddəbir finala yüksəlib. “Monako”nun qollarını 8-ci dəqiqədə Kilian Mbappe, 29-cu dəqiqədə Fabinyo, 77-ci dəqiqədə Tiemu Bakayoko vurublar. “Mançester Siti”də 71-ci dəqiqədə Leroy Sane fərqlənib. “Monako” iki görüşün nəticəsinə görə dörddəbir finala vəsiqə qazanıb. İspaniyanın “Atletiko” (Madrid) komandası da dörddəbir finalda oynamaq hüququ əldə edib. Madrid komandası Leverkuzendə 4:2 hesabı ilə məğlub etdiyi Almaniya “Bayer”i ilə evdə qolsuz heç-heçə edib.

Xəbər 819 dəfə oxundu.