Avropa Liqasının 1/16 final mərhələsinin püşkü atılacaq

Bu gün Avropa Liqasının 1/16 final mərhələsinin püşkü atılacaq. Tədbirdə 32 komanda 16 cütlük təşkil edəcək. Avropa Liqasının qrup mərhələsində ilk iki yeri tutanlar, həmçinin Çempionlar Liqasının qrupunda 3-cü olanlar rəqiblərini tanıyacaq. Sonuncular reytinqinə əsasən səbətlərə bölünəcək. Daha yüksək reytinqli 4 komanda Avropa Liqasının qrup qalibləri ilə eyni səbətdə yer alacaq. Digər “dördlük” isə ikinci yer sahibləri ilə eyni səbətdə qərarlaşacaq. Eyni qrupdan çıxan komandalar bir-birinə rəqib ola bilməyəcək. Həmçinin eyni ölkə təmsilçiləri 1/16 finalda qarşılaşmayacaq. Qeyd edək ki, 1/16 final mərhələsinin ilk oyunları 2017-ci il fevralın 16-da, cavab qarşılaşmaları isə 23-də baş tutacaq.

Xəbər 624 dəfə oxundu.