“Qəbələ” klubu Unibank Premyer Liqasının 22-ci turu çərçivəsində sabah paytaxtda “Rəvan”la üz-üzə gələcək. İdman.com.az saytının məlumatına görə, matç öncəsi komandanın baş məşqçisi Fateh Kavlak fikirlərini gabalafc.az-la bölüşüb: ““Rəvan” ciddi rəqibdir. Onlar artıq birinci dövrədə Qəbələdə keçirilən oyunda bunu sübut ediblər. Sabit heyətə malikdirlər. Komandanın ilk altılıq şansını itirməsinə baxmayaraq, bizimlə matçda sonadək mübarizə aparacaqlarından əminəm.”
Baş məşqçi səfərə 3 xal üçün yollandıqlarını bildirib: “Bildiyiniz kimi sözügedən oyunda xal qazanmaqla ilk altılığa vəsiqənin təmin edəcəyik. Amma səfərə heç-heçə arxasınca getmirik. Məqsədimiz qələbə qazanmaqdır. Bu oyunda maksimum nəticə əldə etməklə həm altılığa vəsiqəni təmin etmək, həm də xal ehtiyatımızı artırmaq istəyirik. Komandada yüksək ab-hava hökm sürür. Zədəlilərimiz sıraya dönüblər. Milli komandanın heyətində olan Mahir Şükürovla Aleksandr Çertoqanov da bu gün bizə qoşulacaqlar”.
Xəbər 1087 dəfə oxundu.