Azərbaycanın paralimpiya yığması və nümayəndə heyəti Braziliyaya çatıb

Rio-de-Janeyroda keçiriləcək XV Yay Paralimpiya Oyunlarında iştirak edəcək Azərbaycanın paralimpiya yığması və nümayəndə heyəti sentyabrın 3-də Braziliyaya çatıb. XV Paralimpiya Oyunlarında 27 idmançımız mübarizə aparacaq. İdmanın altı - cüdo, atletika, pauerliftinq, üzgüçülük, güllə atıcılığı və kamandan oxatma növü üzrə yarışacaq paralimpiyaçılarımızın altısı qadındır. Lisenziyaların sayı isə 44-dür. Bu, “London-2012” ilə müqayisədə 6 idmançı və 8 lisenziya çoxdur. Heyət daha çox gənclərdən ibarətdir. Paralimpiya Kəndində Azərbaycanın bayrağı sentyabrın 5-də qaldırılacaq. İki gün sonra isə Rionun nəhəng “Marakana” stadionunda yarışın açılış mərasimi təşkil ediləcək. Mötəbər yarışda üçrəngli bayrağımızı ikiqat paralimpiya çempionu, “Bakı-2015” ilk Avropa Oyunlarının qalibi və yığmanın kapitanı İlham Zəkiyev aparacaq. Açılış üçün sürpriz də hazırlanıb. XV Yay Paralimpiya Oyunları sentyabrın 7-dən 18-dək keçiriləcək.

Xəbər 1377 dəfə oxundu.