Boks üzrə Azərbaycan millisi lisenziya baxımından 64 ölkəni geridə qoyub

“Rio-2016”nın boks yarışına qatılacaq ölkələrin və lisenziya qazanan idmançıların siyahısı açıqlanıb. Hələlik 69 ölkədən 255 atlet Olimpiya Oyunlarında iştirak hüququ qazanıb. Son lisenziya sahiblərinin adına iyulun 3-8-də Varqasda keçiriləcək WSB və APB üzrə yekun yarışdan sonra aydınlıq gələcək. Rio-de-Janeyroya yollanacaq ölkələr arasında Azərbaycanın lider mövqeyini qoruyacağı sözsüzdür. İlk dəfə kişilərin yarışında tam heyətlə təmsil olunacağımız Olimpiadada millimiz lisenziya qazanan 64 ölkədən öndə gedir. Yarışda Azərbaycan kimi Kuba, Böyük Britaniya, Qazaxıstan və Özbəkistan bütün çəki dərəcələrində rinqə çıxacaq. Müqayisəyə gəlincə, Rusiya, Çin, Fransa, İrlandiya, Mərakeş və ABŞ kimi ölkələr Braziliyaya Azərbaycandan az boksçu ilə yollanacaq. Qadınların yarışında isə aktivimizdə bir lisenziya var. Bu siyahıda Çin və Mərakeş 100 faizlik nəticə göstərib. Qeyd edək ki, “Rio-2016”da boks yarışları avqustun 6-dan 21-dək davam edəcək.

Xəbər 668 dəfə oxundu.