“Azərreyl” voleybol klubu Almaniyada “Alyants Ştutqart”ın qonağı olacaq

Bu gün qadın voleybol komandaları arasında Çempionlar Liqası yarışlarının qrup mərhələsinin sonuncu oyunları keçiriləcək. Turnirin “A” qrupunda yer alan Bakının “Azərreyl” klubu Almaniyada “Alyants Ştutqart” komandasının qonağı olacaq. “Şarena Ştutqart”da keçiriləcək oyunu lixtenşteynli Felippe Şürmann və isveçrəli Saşa Stanisik idarə edəcəklər. “A” qrupundan iki komanda artıq play-off mərhələsinə vəsiqə qazanıb. Bunlar Bakının “Lokomotiv” və Rusiyanın “Dinamo” (Kazan) komandalarıdır. Almaniyadakı görüş üçüncü yer uğrunda olacaq ki, bu da Avropa Voleybol Konfederasiyası (CEV) kuboku yarışlarında iştirak imkanı verəcək. Qrupda 15 xalla “Dinamo” (Kazan) komandası birincidir. “Lokomotiv” 9 xalla ikinci, “Azərreyl” 3 xalla üçüncü pillədə qərarlaşıb. Üç xalı olan “Alyants Ştutqart” isə sonuncu yerdədir.

Xəbər 790 dəfə oxundu.