Atıcılarımız reytinqdə irəlilədilər

Beynəlxalq Atıcılıq Federasiyası fevral ayı üçün reytinq cədvəlini açıqlayıb. İdman.com.az saytının məlumatına görə, yeni siyahını Azərbaycan snayperləri üçün uğurlu saymaq olar. Belə ki, London-2012-yə lisenziya qazanmış İradə Aşumova 10 metr məsafəyə atəş açmaqda 1 pillə irəliləyərək, 59-cu yerə yüksəlib. Bu məsafədə Nigar Bağırova 3 rəqibini qabaqlayıb və 76-cı pilləyə qalxıb. Gənclər arasında Avropa çempionumuz 25 metr məsafəyə atəş açmaqda da 113-cü yerə yüksəlib. O, burada 6 pillə qabağa gedib. Lakin Aşumova yetirməsindən fərqli, bu məsafədə 35-ci yeri 37-yə dəyişib. Güllə atıcılarımızdan Ruslan Lunyov da 10 metr məsafəyə atəş açmaqda 1 pillə aşağı enib və 55-ci yerdə qərar tutub. Stend atıcılarımızdan olimpiya çempionumuz Zemfira Meftəhəddinovanın mövqeyində dəyişiklik olmayıb. O, əvvəlki kimi yenə 16-cıdır. Təəssüf ki, skit növündə mübarizə aparan Nurlanə Cəfərova 3, Emin Cəfərov 2 pillə geriləyiblər. Onlar son siyahıda müvafiq olaraq, 37-ci və 41-cidirlər.

Xəbər 1302 dəfə oxundu.