Dmitri Xomuxa baş məşqçi vəzifəsindən azad edilib

Noyabrın 25-də Rusiya Futbol İttifaqı (RFİ) İcraiyyə Komitəsinin iclası keçirilib. Həmin iclasda RFİ Texniki Komitəsi Dmitri Xomuxanın futbol üzrə gənclərdən ibarət Rusiya yığmasının baş məşqçisi vəzifəsindən azad edilməsini qərara alıb. Xatırladaq ki, Rusiyanın gənclərdən (yaşı 21-dən çox olmayan oyunçulardan) ibarət yığma komandası noyabrın 17-də Bakıda 2017-ci il Avropa çempionatının seçmə turnirində Azərbaycan komandasına qarşı matçda 0:3 hesabı ilə məğlub olub. Beləliklə, Xomuxanın komandası dörd matçdan sonra cəmi üç xal toplayaraq, hazırda qrupda beşinci yeri tutur. Xomuxa Rusiyanın gənclərdən ibarət yığma komandanın baş məşqçisi vəzifəsinə 2015-ci ilin avqust ayında təyin edilib. 46 yaşlı mütəxəssislə kontraktın müddəti 2017-ci il Avropa çempionatının seçmə dövrəsi başa çatana qədər nəzərdə tutulmuşdu. 2013-cü ildə Xomuxanın rəhbərliyi ilə Rusiyanın yeniyetmələrdən (17 yaşa qədər oyunçulardan) ibarət yığma komandası Avropa çempionatında qələbə qazanıb, 2015-ci ildə isə 19 yaşa qədər oyunçulardan təşkil olunmuş yeniyetmələr komandası Avropa birinciliyinin gümüş medallarını qazanıb. Xatırladaq ki, Rusiyanın gənclərdən ibarət yığması 2017-ci il Avropa çempionatının seçmə turnirində uğursuz start götürüb. Rusiyalılar dörd matçdan üçündə məğlubiyyətə uğrayıb – Finlandiya (0:2), Avstriya (3:4) və Azərbaycan (0:3) yığmalarına uduzub. Dmitri Xomuxanın yetirmələri yalnız Farer adalarının yığması ilə matçda qalib gəliblər (2:0).

Xəbər 688 dəfə oxundu.