XII Respublika Spartakiadasında basketbol yarışlarının qalibləri müəyyənləşib

“Gənclik” Tələbə İdman Cəmiyyəti Respublika Şurasının təşkilatçılığı ilə XII Respublika Spartakiadasına start verilib. Tədbir dekabradək orta ixtisas təhsil müəssisələri tələbələri arasında keçiriləcək. XII Respublika Spartakiadasının təqvim planına idmanın 6 növü daxil edilib. Atletika, şahmat, dama, voleybol, basketbol, stolüstü tennis üzrə yarışda qızlar və oğlanlar mübarizə aparırlar. Yarışın ilk günündə basketbolçular arasında qaliblər müəyyənləşib. Oyunlar 2 nömrəli Baza Tibb Kollecinin idman zalında keçirilib. Gərgin idman mübarizəsi şəraitində keçən yarışda qızlar arasında birinci yerə Bakı Sosial Pedaqoji Kolleci, ikinci pilləyə Bakı 2 nömrəli Baza Tibb Kolleci, üçüncü yerə isə Bakı Qida Sənayesi Kollecinin komandası sahib olub. Oğlanlar arasında keçirilən spartakiadanın nəticələrinə görə, isə ilk üçlükdə Bakı 2 nömrəli Baza Tibb Kolleci, Bakı Neft Energetika Kolleci və Bakı Humanitar Kollecinin təmsilçiləri qərarlaşıb.

Xəbər 841 dəfə oxundu.