Sadıq Sadıqov “Neftçi” İdman Klubunun kikboksçuları ilə görüşdü

Xəbər verdiyimiz kimi, Belqradda keçirilən kikboksinqin WAKO versiyası üzrə XX dünya çempionatına yekun vurulub. Azərbaycan kikboksçuları 7 medal qazanıblar ki, onlardan da 4-ü “Neftçi” İdman Klubunun təmsilçilərinə məxsusdur. İdmançılarımızdan Anar Məmmədov (51 kq) və Ehram Məcidov (94 kq-dan yuxarı) dünya çempionatının gümüş, Çingiz Əhmədzadə (51 kq) ilə Ramiz Məmmədov (54 kq) isə bürünc medalını qazanıblar. “Neftçi İdman Klubu” İctimai Birliyi idarəetmə aparatının rəhbəri Sadıq Sadıqov çempionatda böyük uğura imza atmış idmançılarla görüşüb. O, respublikamızda dövlət başçısı tərəfindən aparılan məqsədyönlü idman siyasətindən və Olimpiya Hərəkatı sahəsində görülən işlərdən söhbət açıb. Aparat rəhbəri idmanın sürətli inkişaf etməsi sayəsində bir çox mötəbər idman tədbirlərinin, eləcə də ilk Avropa Oyunlarının Azərbaycanda keçirilməsinin respublikamız üçün böyük uğur olduğunu qeyd edib. Sadıq Sadıqov klubun yetirmələrinin beynəlxalq arenalardakı uğurlu çıxışlarını və ölkəmizi layiqincə təmsil etmələrini xüsusi vurğulayıb, idmançıları qazandıqları yüksək nailiyyət münasibətilə təbrik edib və gələcək yarışlarda onlara uğurlar diləyib. Ehram Məcidov səmimi görüşə və onlara göstərilən qayğıya görə kikboksçular adından “Neftçi” İdman Klubu İctimai Birliyinin rəhbərliyinə minnətdarlığını bildirib. O, bundan sonra daha da intensiv çalışacaqlarına və beynəlxalq yarışlarda respublikamızın idman şərəfini layiqincə qoruyaraq möhtəşəm qələbələr qazanacaqlarına inandığını söyləyib.

Xəbər 862 dəfə oxundu.