UEFA İcraiyyə Komitəsi Mişel Platinin FİFA prezidentliyinə namizədliyini dəstəkləyir

Avropa Futbol Federasiyaları Assosiasiyasının (UEFA) İcraiyyə Komitəsi təşkilatın rəhbəri Mişel Platininin FİFA prezidentliyinə namizədliyini dəstəklədiyini bəyan edib. Eyni zamanda UEFA-ya üzv olan Avropanın bütün milli futbol federasiyaları vəzifəsindən müvəqqəti uzaqlaşdırılmasına baxmayaraq Platiniyə yekdil şəkildə etimad göstəriblər. UEFA-nın baş katibi Canni İnfantino bildirib ki, İcraiyyə Komitəsi və quruma üzv olan 54 milli federasiya M.Platininin ədalətli mühakimə olunmaq və öz adını təmizə çıxarmaq hüququnu dəstəkləyirlər. Platinini FİFA prezidentliyinə seçkilərdə dəstəkləməklə yanaşı, UEFA rəsmiləri gələn il fevralın 26-da keçiriləcək seçkinin təxirə salınmayacağını da elan ediblər. Qeyd edək ki, FİFA-nın etika üzrə komissiyası oktyabrın 8-də Zepp Blatterlə (FİFA üçün "sərfəli olmayan" müqavilələrin təsdiqlənməsinə görə) yanaşı, UEFA prezidenti Mişel Platinini (FİFA-dan mübahisəli ödənişlər aldığına görə) də 90 gün müddətinə tutduğu vəzifədən uzaqlaşdırıb. AZƏRTAC

Xəbər 654 dəfə oxundu.