Fakundo Pereyra: "PAOK-a qalib gəlməli idik"

“Qəbələ”nin son transferlərindən biri olan Fakundo Pereyra üçün UEFA Avropa Liqasının qrup mərhələsinin I turunun qarşılaşması sabiq komandası ilə duellə əlamətdar olub. “Qırmızı-qara” forma geyənədək Yunanıstan PAOK-unda çıxış edən futbolçu yeni klubundakı 2-ci matçında Saloniki təmsilçisi ilə qarşılaşıb. Bunadək Premyer Liqada da debüt edən Pereyra avrokuboklarda “Qəbələ” formasında meydana çıxan 31-ci oyunçu olub. Legioner matç haqda fikirlərini klubun rəsmi saytına açıqlayıb: "Əvvəllər PAOK-da çıxış etdiyimdən sabiq komandama qarşı oynayırdım. Bu komandada bir müddət top qovmuşam. Orada olanlarla yaxşı münasibətlərimiz var. Lakin indi “Qəbələ”nin futbolçusuyam. Bu komandanın uğurları üçün çalışır, bacarığımı əsirgəmirəm. Klubumda ikinci oyunumu keçirdim. Meydanda əlimdən gələni etdim. Lakin komandada yeni olduğumdan mənə müəyyən qədər vaxt lazımdır ki, bütün potensialımı ortaya qoyum. Məhz onda azarkeşlər nəyə qadir olduğumu görəcəklər. PAOK-la qarşılaşmada üstün futbol oynadıq. Bu matçda qalib gəlməli idik. Oyuna nəzarət bizim əlimizdə idi. Qol imkanları da yaratdıq. Hətta real qol vəziyyətləri də oldu. Amma bunların heç birindən istifadə edə bilmədik”.

Xəbər 653 dəfə oxundu.