Dağ Velosipedi Parkında Açıq Federasiya Kuboku yarışlarının ikinci mərhələsi keçiriləcək

Azərbaycan Velosiped İdmanı Federasiyasının (AVİF) 2015-ci ildəki təqvim-planına uyğun olaraq, sentyabrın 12-də Dağ Velosipedi Parkında (Xocasən) Açıq Federasiya Kuboku yarışlarının ikinci mərhələsi keçiriləcək. Yarışda peşəkar idmançılarla yanaşı, həvəskar dağ velosipedçiləri də iştirak edə bilərlər. Reqlamentə əsasən, elit və U-23 yaş kateqoriyasında mübarizə aparacaq iştirakçılar 2,1 kilometrlik marşrut boyunca 7, gənclər və U-17 yaş qrupunun velosipedçiləri 4, 15 yaşadək olan idmançılar isə 3 dövrə vurmalıdırlar. Yarış Beynəlxalq Velosipedçilər İttifaqının qaydalarına əsasən təşkil ediləcək. AVİF yarışda özünü sınamaq istəyən həvəskar dağ velosipedçilərini də Açıq Federasiya Kuboku yarışlarının ikinci mərhələsinə dəvət edir. Baş geyimi və velosipedi olan həvəskarlar qeydiyyat üçün şəxsiyyətlərini təsdiq edən sənədi özləri ilə gətirməlidirlər. Fərqlənən idmançılar yığma komandanın heyətinə cəlb ediləcəklər. AZƏRTAC

Xəbər 838 dəfə oxundu.