Qurban Qurbanov: Belə güclü rəqiblərin Bakıya gəlməsi azarkeşlər üçün maraqlı olacaq

Ardıcıl ikinci mövsüm UEFA Avropa Liqasının qrup mərhələsində çıxış edəcək Ağdamın “Qarabağ” komandası bu mərhələdə Fransanın “Monako”, İngiltərənin “Tottenhem” və Belçikanın “Anderlext” klubları ilə eyni qrupda mübarizə aparacaq. Monakoda keçirilən Avropa Liqası qrup mərhələsinin püşkatmasının nəticələri ilə bağlı fikirlərini bölüşən Ağdam komandasının baş məşqçisi Qurban Qurbanov deyib: “Rəqiblərin hər birinin dünya futbolundakı yeri məlumdur. Belə güclü rəqiblərlə oynamaq, onların Bakıya gəlməsi həm komanda, həm də azarkeşlər üçün də maraqlı olacaq. Bu, eyni zamanda, ölkə futboluna marağın artmasına səbəb olacaq”. Xatırladaq ki, “Qarabağ” komandası Avroliqa yarışlarının pley-off mərhələsi çərçivəsində İsveçrənin “Yanq Boyz” kollektivinə qarşı keçirdiyi cavab matçında 3:0 hesabı ilə inamlı qələbə qazanaraq turnirin qrup mərhələsinə yüksəlib.

Xəbər 803 dəfə oxundu.