Qusarın “Şahdağ” futbol klubu yoldaşlıq oyununda böyük hesabla qalib gəlib | |
Futbol üzrə Azərbaycanın I Divizionunda yüksək yerlərə iddia edən Qusarın “Şahdağ” futbol klubu avqustun 4-də növbəti yoldaşlıq oyununu keçirib. Yeni mövsümə ciddi hazırlaşan kollektivin budəfəki rəqibi Xaçmazın həvəskarlardan ibarət komandası olub. Qusarlı futbolçular bu matçda rəqibindən üstün oyun nümayiş etdirərək 5-0 hesabı ilə qalib gəliblər. “Şahdağ” komandası növbəti mövsümə hazırlıq çərçivəsində bir neçə yoldaşlıq görüşündə qüvvəsini sınayıb. İlk oyun “Sumqayıt” klubunun əvəzedici kollektivi ilə keçirilib. Həmin oyunda 2-2 hesablı bərabərlik qeydə alınıb. Növbəti yoldaşlıq matçında Telman Cavadovun yetirmələri “Neftçala” komandasına 0-2 hesabı ilə məğlub olub. Komandanın avqustun 9-da “Qaradağ Lökbatan”, 15-də isə MOİK-lə yoldaşlıq oyunlarında qarşılaşması nəzərdə tutulub. |
|
Xəbər 825 dəfə oxundu. |
|
|