Azərbaycanlı yeniyetmələr 13-cü Avropa Gənclər Olimpiya Festivalının ilk günündə mübarizəyə qoşulublar

Azərbaycanlı yeniyetmələr iyulun 27-də “Tbilisi-2015” 13-cü Avropa Gənclər Olimpiya Festivalının ilk günündə mübarizəyə qoşulublar. İlk dəfə belə mötəbər beynəlxalq yarışmada mübarizə aparan atletlərimiz yüksək nəticələr qazanmasalar da yaxşı təcrübə qazanıblar. Disk atma yarışmasında meydana daxil olan yeniyetmə idmançımız Nurəddin Babayev metal kütləni 31,08 metr uzağa tullamaqla yaxşı göstəriciyə nail olub. Məşqçilər onun nəticəsini dəyərləndiriblər. Yeniyetmə idmançımız Rüstəm Şükürov isə uzunluğa tullanmada 6,19 metr göstəriciyə nail olub. Digər atletimiz Heybət Salayev isə hündürlüyə tullanmada 1,74 metr nəticə göstərib. Yüz metr məsafəyə qaçmaqda bacarığını nümayiş etdirən yeniyetmə idmançımız Vaqif Bağırov isə 11,34 saniyə ilə mübarizəni 6-cı pillədə başa vurub. Qeyd edək ki, həmin gün idmançılarımızı yarışların keçirildiyi idman arenasına aparan avtobusların tıxacda qalması səbəbindən yeniyetmələrimiz mübarizəyə son təlim məşqləri keçmədən qoşulublar. Növbəti dəfə isə Azərbaycan yeniyetmələri idmanın üzgüçülük və cüdo növləri üzrə yarışlarında güclərini sınayacaqlar. AZƏRTAC

Xəbər 849 dəfə oxundu.