UEFA Avropa Liqasının birinci təsnifat mərhələsi çərçivəsində Gürcüstanın “Dinamo” klubu ilə qarşılaşacaq Azərbaycanın “Qəbələ” futbol komandası artıq Tbilisidədir.Komanda Tbilisidə ilk məşqini keçirib.
Baş məşqçi Roman Qriqorçukun rəhbərliyi altında yaşıl meydançaya çıxan futbolçular əsasən fiziki hazırlıq və taktiki plan üzərində çalışıblar.
Mövsümə hazırlıq məqsədilə iyunun 10-dan 19-dək Türkiyənin Ərzurum şəhərində, 20-dən 30-dək isə Qəbələdə təlim-məşqləri keçən komanda “Dinamo” ilə oyuna ciddi hazırlaşır.
Baş məşqçi Roman Qriqorçuk müsahibəsində deyib: “Bizim məşqlər, həmçinin komandamızdakı böyük dəyişiklikləri nəzərə almaq üçün çox az vaxtımız oldu. Komandaya yeni oyunçular cəlb etmişik. Düşünürəm ki, bu müddət ərzində vacib məqamları gözdən keçirə bilmişik və ümid edirəm ki, bu matçda istədiyimiz oyunu göstərə biləcəyik.
Qarşı tərəfi də ciddi rəqib kimi qiymətləndirən baş məşqçi, azarkeşləri maraqlı oyun gözlədiyini bildirib.
“Qəbələ” iyulun 1-də “Dinamo Arena”da son məşqinə çıxacaq. Komandalar arasında ilk oyun iyulun 2-də Bakı vaxtı ilə saat 21:00-da başlayacaq.
Oyunu İsraildən olan hakimlər briqadası idarə edəcək.
AZƏRTAC
Xəbər 895 dəfə oxundu.