Azərbaycan millisinin baş məşqçisi Robert Prosineçki UEFA-nın rəsmi saytına müsahibə verib. - Yeni ili necə qarşıladınız? İstirahət edə və güc toplaya bildinizmi?
- Dekabrın 22-nə qədər Bakıda qaldım. Daha sonra Zaqrebə getdim, yeni ili ailəm və qohumlarımla keçirdim. Bayram çox əyləncəli keçdi və mən müsbət enerji toplaya bildim.
- Azərbaycan millisinə təyinatınız haqda danışardınız. Sizinlə Bosniya və Hersoqovina yığması da maraqlanırdı. Niyə məhz Azərbaycan millisini seçdiniz?
- AFFA-nın baş katibi Elxan Məmmədovla Parisdə tanış olduq. İlk dəfə orada danışdıq və görüş çox maraqlı alındı. Bir neçə gün keçdikdən sonra biz yenidən görüşdük və bu dəfə daha ətraflı söhbətimiz oldu. Daha sonra Bosniya və Hersoqovina variantı ortaya çıxdı. Ancaq mən Azərbaycan millisinə üstünlük verdim. Bu, sözün həqiqi mənasında böyük bir layihədir. Gələcəyi parlaq görürəm. Azərbaycanda işləmək mümkündür və bunun üçün hər cür şərait var. Bəli, Bosniya və Hersoqovinanın Avropanın aparıcı çempionatlarında çıxış edən yaxşı futbolçuları var. Lakin Azərbaycan millisində çalışmaq mənə daha cəlbedici gəldi. Burada söhbət puldan getmir. Çoxları belə düşünə bilər. Ümumiyyətlə, futbolda hər şey pulla ölçülmür. Burada daha vacib amillər var. Əlbəttə, bu seçimimdə Azərbaycan yığmasının mənimlə Bosniya və Hersoqovinadan öncə maraqlanması da böyük rol oynadı.
- Qarşınıza hansı vəzifələr qoyulub və siz nəyə ümid edirsiniz?
- Çox təəssüf ki, Azərbaycan yığması "Avro-2016" nın seçmə mərhələsində keçirdiyi 4 oyundan bir xal belə toplaya bilmədi. Bu səbəbdən futbolçuların psixoloji durumu yaxşı vəziyyətdə deyil. Hazırda əsas məqsəd futbolçuların psixoloji durumunu yaxşılaşdırmaqdır. Futbolçulara qələbə ruhunu və özünəinamı qaytarmalıyıq. Seçmə mərhələdə turnir cədvəlində mümkün qədər irəliləmək istəyirik. Bəli, bunu etmək çətin olacaq. Amma bizdə böyük potensiala malik gənc futbolçular var. Azərbaycan millisi ilə müqavilə imzaladıqdan sonra bir sıra futbolçuları izləmək imkanım oldu. Onların sırasında diqqətimi çəkən xeyli futbolçu var idi. Ad çəkməyəcəm, ancaq onlara inanıram.
- Sizin rəhbərliyiniz altında Azərbaycan millisindən Berti Foqtsun zamanındakı komandanın oyununu gözləmək olarmı? Siz dəfələrlə hücum futboluna üstünlük verəcəyinizi bəyan etmisiniz. Ancaq komandanın belə oyun sərgiləmək potensialı varmı?
- İlk olaraq ondan başlayım ki, futbolda müdafiə olunmaq hücum etməkdən daha asandır. Dəyişikliklərə gəlincə, bu, həm oyun sistemində, həm də heyətdə olacaq. Hücumda daha səmərəli, fərqli şeylər etməyə potensialımız var. Futbolçular təkcə irəli qaçmalı deyil, həm də yaxşı oyun sərgiləməlidirlər. Təbii ki, bu, asan olmayacaq. Ancaq bunun üçün çalışacağıq.
- Azərbaycan futbolundakı infrastruktur haqda nə deyə bilərsiniz?
- Azərbaycanda infrastruktur çox yaxşıdır. Burada yeni stadionlar və idman komleksləri inşa olunur. Bunları öz gözlərimlə görmüşəm və düşünürəm ki, bu bütün ölkə üçün faydalı olacaq. Azərbaycanda futbol oynamaq üçün hər şərait yaradılıb.
- Azərbaycan Premyer Liqasının səviyyəsi haqda fikirləriniz öyrənək...
- Çempionatın səviyyəsi kifayət qədər yüksəkdir. Premyer Liqanın oyunları maraqlı keçir. Burada 3-4 yaxşı komanda var. Məsələn, Avropa Liqasının pley-off mərhələsinin astanasında dayandırılan "Qarabağ" klubunu misal çəkmək olar. Premyer Liqada güclü klubların heyətlərində xeyli səviyyəli legioner futbolçular çıxış edir. "Qarabağ"da bunlar Reynaldo və Riçard Almeydadır. Belə futbolçularla birgə oynamaları yerli oyunçuları da güclü edir və onlara təcrübə qazandırır. Ümumiyyətlə, Azərbaycandakı legioner limiti (meydana çıxacaq 11 futbolçudan ən azı 5-i yerli oyunçu, onlardan da 1-nin yaşı 21-dən az olmalıdır) məni qane edir. Əsas budur ki, meydandakı legioner futbolçular yerli oyunçulardan üstün olsun. Belə vəziyyətdə yerli futbolçular da sürətlə inkişaf edərək, güclənəcəklər.
- Ümumilikdə, Azərbaycan haqda nə söyləyə bilərsiniz?
- Azərbaycan və Bakı mənim çox xoşuma gəlir. Bakı çox gözəl şəhərdir. Xüsusilə, memarlıq abidələri ilə çox cəlbedicidir. Bu şəhər sürətlə inkişaf edir. Böyük investisiyaların qoyulması hər şeydən xəbər verir. Mənim ailəmlə Azərbaycana gedişim, bu ölkəyə olan münasibətimin əsas göstəricisidir. Qızlarım Bakı məktəblərində təhsil alacaqlar. Burada yaxşı həyat üçün hər şey var. Azərbaycanı tanıyırdım, ancaq orada heç vaxt olmamışdım. Təklif alan kimi internetdən bu ölkə haqda maraqlandım. Müasir dövrdə internet vasitəsilə dünyanın istənilən nöqtəsi haqda məlumat almaq mümkündür. İlk işim şəkillərə və Bakının videoroliklərinə baxdım, sonra araşdırmağa davam etdim.
Xəbər 1006 dəfə oxundu.